Khadu kukhuk sejam, waktu lembur kebian jo. Injuk ayuk na, waktu ku mulang jak khang kekhajja, khadu togok. jak khang ku jadi kuli, say khadu belasan tahun ku lapahi. Senang nihan ki wat lemburan. kipak buya, jak lembur hinnolah lebih na gaji say ku tekhima unggal bulan. Mak sepikha, kidang buhung ki mak cukup. kattu sangun sallan haga wat tikhah, pakai nyegok injuk indai..
Nyak lapah, ilung parkiran. nuju mid khuda khuwa say nunggu jak jinna mehayu.
Petika hinnolah, HP ku kebunyi, nandako wat sms kukhuk.
''..aah, paling anak di lamban haga ngelehot pengusung kak mulang sekhabbok lagi..'' kicik ku lom hati.
Ku liyak HP tumbay ku, say khadu meliyom di indai kak nyak ngeluwah ko ya.
wah, peneduh ku salah. kekikha na jak Manager.
injuk ayukna, ki boss sms, pasti uwat 'masalah' di khang kekhajja.
''tulung, pay mid Costumer di Cikarang. wat masalah bakhang kham say ti kikhim nambi. tekhima kasih''
Tuppak lebon, bayangan haga pujama anak memidokhan, kak jimmoh. injuk khani sabtu say ayukna.
paling mawat, lepas menggekhib nyak appai lapah. togok Isya, mulang debingi.
kidang gelakh na kham kuli, najin sokhok, jadi haga mak haga harus ti lapahi.
Ku balos, sms na boss. ''iya pak, kanah ku handle langsung..".
Nyak ngedi HRD, laporan khik nyiap ko seunyinna kepekhalluan pakai kak anah di Costumer. Ku ajak Operator sai. Ulih nyak pandai khappa lamon na Bakhang say di claim jinna. Khadu siap unyin, sikam khuwa inday lapah. injuk khadu ku teduh, haga sassak guway pissan hijjo. khelaya dipa-ipa macet. maklum, petika na pekhwatin mulang kekhajja.
Puhum na, sikam sappai di Costumer kekikha jam walu debingi. tellu jam telikut jak jam ku mulang injuk khani-khani biasa.
Sekhadu jak laporan di secom, sikam langsung mid di line. ngekhajja ko bakhang say ni tulak tiyan, ulih wat masalah.
waduuh, lain kah lima khibu bilang na. kattu lima belas khibu. khupa na bakhang tengikhim jak khani ketellu so, harus ti check moneh.
Sangun sassak ki jadi perusahaan Vendor. harus ngelayani kehaga ni Costumer. Costumer khappa jukhagan. khajjo hana tiyan, hak kham harus nukhut.
Mak ti khasa, khadu jam khua belas debingi. Alhamdulillah, lepun moneh kekhajja'an. Anak kajjong khadu induh min pikha kali gumakhang.
Khayya kinjuk Manager ku, halok khadu min tellu kali iya tekehanipi. kidang say nyani gamba, sms jak Driver. nyawako mingan ni sussung jam khuwa kak anah. Maklum, kahdu gatti Shift. naa, haga khuwa jam pekkukh nunggu.
''..khadu, kham nunggu di luwah gawoh..'' haku di inday. ku pikikh, bunjak bangik na ngudut khik marok di luwah, jak bubalah jama Secom, say umum na ngawaq jak nabuk jamma lah. jak ninjuk bekhattihlah. say nukhut nyak, mak pekhallu ti cekhita ko. ulih dakha bugu na ki Secom mak bekhani khik mak bani. Hmmm...
Sikam khuwa inday, mid sebekhang khelaya. mejong di gegili, ngudut, khik nginum way laccakh tengilu jak lom.
Bettoh moneh, tennai. Ajo khadu jam setengah satu. 'ngedudu ketimbalan'. Mak benni liwat Tukang Siomay, makai Motor. kidang takhu di hadap ni PT, Costumer sikam. Haga nyebekhang luwot, dakha sokhok na. apilagi Khelaya 'khuwa lajukh', say bekhak na lain cutik.
Ah,, kanah gawohlah kak ya motokh, haku di inday.
Mak benni Liwat moneh, Tukang siomay say makai sepida. Tepat nihan jak ilung kanan.
''.. naa, kalau rezeki nggak kemana,..'' haku di inday.
pas liwat di depan, sikam lassung coccok.
''siomay bang,..''. hana sikam setengah bakhong.
Iya, takhu. dalih cawa: ''sama Abang yang itu aja pak, Dia juga dagang siomay..'' hana, palas nujuk mid say dagang siomay makai motor, di sebekhang khelaya. Dakha mak nekhima khejeki na jamma hijjo. haku lom hati. Iya langsung lapah. Sikam moneh lapah nyebekhang. Ubah mak moneh khadu coccok.
'',,siomay nya Mas, Dua piring..'' Haku injuk cakha Boss. Lassung ni sani ko. ''yang tadi abis pak..?'' hana nanya di sikam inday.
''Belum, cuma tadi di suruh ke-mas aja''. jawab ni inday.
'' Udah mau Abis Mas..? haku. sambil menok iya kekhajja.
''..Iya pak. apa semua aja..?''. hana palas nunjuk ko isi na Belanga.
''Owh, ya udah gak apa-apa.'' haku. Ku teduh, pudak sikam khadu ngeni pandai, sikam khadu kebetohan.
Sikam nemon nganik siomay, no. Mejong di hadap na Gerbang, khang sikam Inday kekhajja kakhu. Secom pagun injuk say khadu, ngawaq pujama mulang tiyan khayya. Mak benni, luwah Lima mulli. Karyawati jak Lom.
''Mas,, somay-nya dong,,..'' hani tiyan.
''Waduh, abis Neng. Udah di Borong sama bapak berdua ini,,''Hani si tukang siomay.
''yaaa,, si Abang, hani muli si sai na..''
na, wajakh do, hana hati ku. petika na Istirahat. Mulli kemanno mak tekhok nganik emmi di kantin. bacak na tiyan nganik siomay atau bakso.
''ya udah, ntar saya panggil siomay yang pakai sepeda tadi,,'' hana si tukang somay.
''Emang ada Mas..??'' hana mulli say bakhih.
''ada. tadi ke arah situ..'' hana nujuk mid ilung kanan.
Mak benni iya biluk, nyussung say dagang makai sepida. Sikam jojong gawoh nganik siomay, ikah pepikha kali nyilikhan mid lima mulli say 'injukna' sikop. maklum mak moneh tekhang pemenok, jam setengah satu debingi jo.
kekikha sepuluh menit, tiyan moloh. Pedagang siomay say makai motor, khik say makai sepida bu'ikhingan.
Sikam juga khadu jak nganik. Ku bayakh, in injuk boss cakhana..
Say dagang makai motor lassung mulang. say makai sepida, lanssung ngelayani lima mulli say ngebelli siomay.
Sikam moneh, lassung moloh nyebekhang khelaya, moloh mid khang sikam tehabu muaq kakhu.
Nyak jadi kangonan,..
Ki umpama, say makai sepida mak peduli jama 'inday' na say makai motor. khettina iya kah laku khuwa pikhing.
Kidang, andah na iya 'khila', ngeni ko 'pembeli' jama say makai motor. iya laju laku lima pikhing.
Khabbok lagi jam Duwa. Driver say nyussung Sikam inday khadu haga togok.
Subuh hijjo, Nyak ngena pelajakhan say helau. Ki kham 'khila' bubagi, kham pasti ngena say bunjak.
''Kalau rezeki, Enggak kemana..''
LEPUN.
TABIKPUUN,..
Bekasi, 25 April 2014
Hendri Semaka
Tidak ada komentar:
Posting Komentar