SEGATA : KABAN PUYUH (1)

Hantakha pullan khik sabah
Mejawoh, kidang khedik bagi mu
Getting hati sikam say dibbah
Niku hambokh, ngebayang halinu

Matamu nyilikh jak jawoh
Hippa kehaga, mak payu hamu
Sikam segok kasakh lemoh
Mati kham indai, Nyak api niku

Sikam dija kaban puyuh
Hukhik mak tenang, pak sai mak demon
Khang takhu sikam di yuyyuh
Balaq di tulung, penok mak lamon

Salai khisok kena tejuh
Nisapu angin, astawa gimon
Pak cutik mak ngedok teduh
Najin mak mati, khayang lom angon

Kenui datas kakhi nyayang
Kaban dibah, nyuwoh kikhi kanan
Di sikam lamon mak senang
Payah mekelik, Manjak mak mingan

Lagi ami inday bukhung
Mingan hambokh, budandi dibatang
Sikam mak ngedok nulung
Kah tegakh, suakha mak mehatang

Kipak sai mak ngedok teduh
Badan melunik, payah mekelik
kok pemengan lagi induh
Ngenai khik ngakkakh, tikhah ni kantik



Tabikpuun,,

Bekasi, 07 Juli 2015

HENDRI SEMAKA

SEGATA: KABAN PUYUH (2)

Sikam puyuh, kaban pekhwatin

Hukhik mak puguh, lain sebatin

Mak liyu kutti kimas khik khadin

Sekali cawa, lamon say menyin

Sikam cawa sapa say menyin

Jak Kelasa laju tesimbin

Api ubah sikam goh appin

Jak ti pakai tuppak di teppin 

Cecok mejong, sikam mak tanggom

Hayu watikh, Debingi kakhom

Khatong Luhukh, dipa bu indom

Injuk kemiccak, Hukhik lom ondom 

Sikam puyuh, khisok tesondom

Payah segok, nyepok say khinggom

haga manjak, khabai khik liyom

Mulang kedogok, pagun mak pedom..

Kutti mayang, lamon say sayang

Sekali manjak, khisok kebilang

Say kahud kutti, mak akhu luwang

Lebon jak bilang, sang makhga miwang

Kuti kenuy, suakha hatang

Mata goh apuy, Badan mak bakkang

Bagi kutti, Hukhik jo gappang

Asing kehaga, tinggal ngejimpang

Tabikpuun,..

Bekasi, 13 Juli 2015

Hendri semaka 

Hendri Semaka Lahirkan Banyak Wayak Lampung

Hendri Semaka Lahirkan Banyak Wayak Lampung