BINASA SELAT SUNDA

Khuwa ngepuluh khuwa
Desember walu belas
Kakikha pukul siwa
Khatong galumbang ganas

Banten di pulau Jawa
Kalianda, Tanggamus
Lamon say lebon nyawa
Bilangan ni bukhatus

Nekhak di Pesawakhan
Togok di Khaja basa
Bilangan ni khibuan
Kena moneh binasa

Tangih nguyun ko Hakhta
Kok badan mak kuyunan
Nengis kabakh bekhita
Malang ni punyandangan

Minak muakhi kaban
Mekik mekayung tuyun
Hancokh Gedung khik lamban
Khibuwan mak ke uyun

Pepujian di Tuhan
Semapu di khinci ni
Sekhadu anjak isan
Tumbak di lambung heni

Ya hiyon tengi pissan
Tulung puwakhi hani
Sekhadu anjak isan
Mak lagi ngedok bunyi

Semapu di tanoman
Khukkak mid dija dudi
Netos puwakhi kaban
Tekhondom dilom Bumi

Tangih Ki setulungan
Kok minjak mak kuwawa
Jawoh jak ngekhanyaman
Najin lagi wat nyawa

Lamon mayit tekhogok
Ninggal mak sejonjoman
Lebon ni telon lawok
Nayah mak kehaluan

Way lawok geluk togok
Ngebatok kecadangan
Mak lagi mingan segok
Tegakh khadu mak mingan

Kantu payu Puwakhi
Kham jejama budu'a
Ano jadi penghakhi
Pakai kham ngekhakhaba

Kalau sunyin dusa ni
Di happun ko say Kuasa
Dang pay ti sikhang lagi
Say nyani Kham binasa

Allah Tuhan ku Robbi
Jengan sikam bu sumbah
Susun sepuluh jakhi
Niku jengan bu sekhah

Happun segala dusa
Mahap di kesalahan
Bukilu antak ija
Lalika ni cubaan

Temon Kham mak bu daya
Mak luput kesalahan
Allah do say kuasa
Kedau unyin ukhusan


Tabikpun,..

Bekasi, 28 Desember 2018

Hendri semaka

#Lampung #sang bumi khuwa jukhai