Segata: " ABANG BATIN "

Langgakh batang kepayang 
Ngekhinggom batang paku 
Lain Adik mak sayang 
Mula kham lipang haku 

Enggok nyak nutuk tandang 
Seladak khadu leju 
Khabai ku abang cadang 
Ki khasan kham telaju

Tegokh unyin pekhwatin
Di dakhak sakhah masu
Niku mekhanai batin
Nyak Muly anak pussu



Makai bulipat kain
Kebayan lamon semu
Ganta pilih ku balin
Sepok say tanggom hamu

Ngawil anak ni patin
Mak mansa, masang bubu
Tanno Nyak mundukh nekin
Mahap mu say ku kilu

Masang Kebung Lalidung

Abang isi na gedung
Tutukan sanga makhga

Budakhak lupa candung
Kukhuk jak pekon teba
Mak guna kham pubandung
Kantubang jadi haba

Landiyan mak bu sakhung
Candung lupa di huma
Mula bacak Kham ukhung
Sesol mak ngedok guna

Selom di olok gahung
Mandi debi jam lima
Mak akkuh ni Nyak buhung
Ki hati mak nekhima


Tabikpun,..

Bekasi, 22 September 2019

Hendri Semaka

Segata: TEDUH SAKA

Injuk temon peneduh ku 
Lagi muaq ni kham tungga 
Tulung pekekh moloh haku 
Kantu nyesol mak buguna 

Kidang cawa mu dinana 
Angkah Abang di hati ku 
Bang ganta nyak di puhina 
Nyak ni tok ko mak bukhadu

Tunyin do khasa kahud ku
Mak ku anggop cela wada
ganta tuwon balosan mu
Kikha ni Nyak di pukhuwa

Nyak miwang dilom lamunan
Ingok janji mu say khadu
Bubisok di sembayawan
Acak kheji ga tenemu

Kidang ana bakhang khadu
Balaq binjik mak buguna
Khadu tuwon di judu mu
Niku dek bulamban mena

Angkah sai kilu ku diku
Unyin ko kahud mu diya
Ulih ki anjak hati ku
santokh ku kikhimi du'a 


TABIKPUUN,..

Bekasi, 12 Desember 2014

Hendri semaka

Segata " FALSAFAH HUKHIK"

Lapah jejama hija

Falsafah nekham Lampung

Tawai ni Batin, Khaja

Ijah Tuyuk gekhinung

Bilang ni uwat lima

makna ni temon buyun

Pakai nekham jejama

kenyin betik di lakun

Bu-Pi'il pusanggikhi

Hinno bunyi pekhtama

Liyom di kanan kikhi

Ki ngeguway say hina

Khega dikhi say pokok

Kadang ngalah ko nyawa

Ki hinji kham mak dapok

Bacak lulus celana

Juluq-Adoq, kekhuwa

Balak moneh makna-ni

Masing-masing jekhema

Pandai di Hejongan ni

Say batin ya junjungan

Tutukan sanga makhga

Lain kah petutukhan

Ti khegga'i pak ngukha

Telu, Nemui-Nyimah

Manjau dalih putungga

Say makai tilah khamah

Senga muakhi sang makhga

Khedok kemuakhian

Ki liwat, laju singgah

Khattop dilom anjawan

Mak ngedok khasa pungah

Ke-eppak, Nengah-Nyappukh

Calaq tutuk bekhani

ki Bebay ya di dapukh

Bakas, lain jengan ni

Mak liyom di kelasa

Nyemu, lain sifat kham

Di payya bu-gehasa

Ngeba ko hulun tikham

Penutup say kelima

Yakdo Sakai-sambayan

Asing guway pujama

Santokh kham setulungan

Babikh unyin ni makhga

Dilom segala guwai

Pak sang-tiyak, bu khega

Khanno do ya, kinjuk Way

Dang tippik guway betik

Guway helau dang nanggung

Ti pakai najin cutik

Tanda ni jekhma Lampung

Lima Falsafah hukhik

Nanda ko jamma Lappung

Ano, ijah say bettik

Budaya kham say agung

Lapah jejama hija

Dang sappai ya telikut

Khadu pay antak ija

Segata khadu puput.

TABIKPUUN,..

Bekasi, 22 Februari 2014

Hendri Semaka

SEGATA: SPAN BUTTAK

Melamon kham ngeliyak

Memulli zaman sinji

Makai celana buntak

Kelia'an pusokh ni

Layin celana bukhak

Najin kukhang, bahan ni

Sina budaya kikhak

Jak Luar negeri dudi

Kipak paha ni panjak

Mak ngedok liyom hati

Tagan kipak wat kukhak

Mak tandok, kantu khugi

Kejuju ni say handak

Tilah ya bunjak bani

Mak lagi wat pengliyak

Liyom ni khadu mati

Mak sikkuh pak puhayak
setinggulan tuwot ni
Kawai jakhang goh ayak
Mak ti penok Kham khugi

Nutuk ko kaban bekhak

Nyin gaul bahasa ni

Say khagah tuha mikhak

Mekhanai kejuju ni

Goggoh pisang temajak
Bebengih unggal khani
Induh sikop induh mak
Bubasa mawat lagi

Tumbay lagi kham sanak

Injuk ni mawat kheji

Mula temon mebiyak

Kham say wat anak muli

Kihaga bacak-bacak

Bacak Zaman saka ji

Mak lamon ga geniyak

Semula, Bakas sikhi

Mula segata manjak

Kalau Lampung mak kheji

Lain Nyak icak-icak

Ajo kuliyak nambi

TABIKPUN,..

Bekasi, 29 Agustus 2013

Hendri semaka

SEGATA: "GUMAKHANG"

Bella nyomokh ku inday

Kusippon dilom hati

Haga cawa Nyak khabai

Tikham diku Nyak sikhi

Tikham Diku Nyak sikhi

Injuk way campokh minyak

Tiyak tukhuh jak Akhi

Khanno umpama di Nyak

Halok niku mak pandai

Demon ku khadu benni

Khumasa mak sasuai

Ya ukhung ku lapahi

Ya ukhung ku lapahi

Khabai liyom ku bunjak

Tungga dillom hanipi

Nyak sikhi, laju minjak

Kidang khadu sukukh ku

Kham mingan mu indayan

Ulih, pak payu hamu

Mak bakal Nyak kebaban

Mak bakal Nyak kebaban

Niku bunjak segala

Anak tuha jukhagan

Tutukan sanga makhga

Jak debi kuhanipi
Semangkung gekhing nyimbin
Benni mikikh khappa ki
Najin halok mak mungkin

Najin tilah mak mungkin
Ki Kham khuwa busanding
Adoq mu muli batin
Mekhanai lamon gekhing

Mekhawan Nyak gumakhang

Niku mak kecadangan

Cutik, mawat ki ngukhang

Niku pagun tutukan

Niku pagun tutukan

Indayan goh saka ji

Kilu ku jama Tuhan

Judu mu betik hati

TABIKPUUN,..

Hyogo ken, 20 agustus 2013

Hendri Semaka

Segata: " KUMBUT HUJAU "

Adek say kumbut hujau 
Nyani sasakh hati ku 
Angon ku laju jajau 
Memuaq ni putagu 

Adek say kumbut hujau 
Di hak ipa lamban mu 
Mingan kodo nyak manjau 
Khatong kak malam minggu

Putungga sangun ampai
Nyak tuppak kahud diku
Kilu ku angon kon pai
Alih ni nyak pungatu

Dang hati mu wat khabai
Lain nyak ngelelaju
Lamon muli ku tindai
Mak helau kimak niku

Benni nyak nge-mekhanai
Ajo mangkung ku halu
Melamon kiya indai
Kidang kung setatuhu

Ajo nyin niku pandai
In jadi angonan mu
Du'a ku jimoh sawai
Adek jadi judu ku

Tabikpuun,..

Bekasi, 22 september 2014

Hendri Semaka

Segata: " TIKACAI "

Tekacai manuk kakhai 
Hambokh bukhung hanabokh 
Niku ngajak nyak cekhai 
suya ni bulup tanjokh 

gedah jahal ni lakun 
gekhing mu bagi khuwa 
ganta kham temu tundun 
talaq kukhuk K.U.A

ibakhat ni kecici
kepi lunik ku patoh
suya mu lamon khinci
alasan mu menyuwoh

mula ni haku makin
ki ngeni kahud hada
hati mu mawat yakin
nemah hukhik sengsakha

kukhang kahud mu di nyak
nyak sakik mak bu hakhta
uway pujama minyak
khena kita umpama

lain sai kekhugian
nyimbak di anak kita
tekacai jak babangan
andah ni hulun tuha


Tabikpuun,..

Bekasi, 17 Oktober 2014 

Hendri Semaka

Segata: " MIDANG "

Tengis pay kidah kantik 
Nyak haga nyukhah cutik 
Kisikh jak lagi lunik 
Segala ni mak ngemik 

Mak lekok anjak sakik 
Takhu di anjung khupik 
Puwakhi inday khamik 
Hulun tuha ku tippik

Lain moneh ku binjik
Mula pantun ku sanik
Hukhik ku khasa pahik
Benni mak nungga suppik

Merantau jawoh dija
Nuju mid pulau Jawa
Niat nyomokh kekhajja
Nyin khubah segala na

Mak ngedok sapa-sapa
Jawoh jak inday kanca
Usaha api juga
Khadu lamon ku cuba

Butahun mak pujama
Ninggal ko hulun tuha
Pekon kahud ku saka
Ku khuwang pinsan kala

Du'a ku kalau sia
Jawoh jak haban bala
Kanah kak mulang buka
Kham dapok moloh tungga

Lohot di kuti disan
Dang Nyak jadi angonan
Kalau Nyak ingok Tuhan
Mingan ngebatok badan

Jama puwakhi kaban
Di Abang adik nakan
Pengilu khik hakhapan
Hulun tuha kham andan

Ganta kham sejawohan
Nyak balaq di khantawan
Nekhus ko kelajun
Nyin goggoh hulun kaban

Kilu ku jama Tuhan
Pakhda munyai mekhawan
Najin Induh ya kapan
Kham mingan setungga'an


Tabikpuun,..

Bekasi, 12 Desember 2014 

Hendi Semaka

Segata: " BEKHITA" (BEGAL)

Lamon nihan bekhita 
Mekhamik sengatukhap 
Pekon togok Jakarta 
Jak lappung togok Akhab 

Khappuk di ipa-ipa 
Khadu mak khabai lagi 
Haga ngadu di sapa 
Ki hukum kham mak tegi

Hani anjak Kham lampung
Nyak jadi lunik hati
Lamon say kena geppung
Wat say ni timbak mati

Ni suwah juga nayah
Lamon moneh kebuwi
Sangun biyak khik payah
Ujian kham ji lawi

Kukhuk di angon-angon
Ku dacing khik ku ayak
Api ki sangun temon
Bekhita say ti liyak

Sukhah say di luwahan
Jamma kham tukang cattik
Injuk kham jahal nihan
Sallan nyepok say betik

Lain moneh ngebujuk
Nyani kelom bekhita
Lamon say kena tinjuk
Mak paham cawa kita

Jadi mawat ki temon
Kham Lappung khanno unyin
Ulama juga lamon
Ki haga tipapenyin

Apikah suku bakhih
Mak ngedok say goh khena
Halok andah ni jekhih
Hani indai dinana

Tukhun ku pikikh luwot
Cawa ni indai, kantik
Najin mawat ngekhawot
Pagun kham mengan bangik

Halok mak haga payah
Wat tiyan dudi cawa
Kidang say kuli nayah
Takhu di pulau jawa

Hani kham lampung malas
Timbalan ni keduwa
Padahal khadu jelas
Lamon say jadi jamma

M.P.R khik mentekhi
Wat pelisi Tentara
Lamon disan puwakhi
Kidang mawat ketara

Wat moneh ngekhakhaba
Cawa ni say jak midang
Ulih makai Narkoba
Say ngukha lamon cadang

Ku khasa halok temon
Narkoba jadi ngeba
Ulih bukti na lamon
Mula dang ti cacuba

Mak ngedok kekhajja'an
Halok do lantakhan ni
Nekhus ko kelajuan
Jak khabai laju bani

Mak khattop pembangunan
Adil nyappot di langik
Payah nyepok pemengan
Tangih kham hukhik bangik

Dunia bekhak nihan
Tanoh kham subuk nana
Kidang pemekhittahan
Makkung lamon ngulah na

Jahal nihan khelaya
Kekhajja'an mak ngedok
Kham lappung mak budaya
Kah balaq nyomokh tandok

Wat hati mak bujiwa
Niat bayu lom hulu
Pembangunan di Jawa
Khuwa bubanding walu

Kattu payu puwakhi
Kham betik ko di lakun
Kenyin do hulun sikhi
Lapah kham hukhik khukun

Say lappung utama ni
Saibatin khik pepadun
Keduwa kasakh bani
Ki kham putemu tundun

Kilu kham jama Tuhan
Kham lappung kasakh cakak
Luwah ko kebetti'an
Togok di tanoh luppak

Lapah jejama dandan
Ki wat sipat kham bukhak
Tagan payah di badan
Asal guwai dang jukhak

Bu pi'il pusenggikhi
Bettik di tikkah laku
Kalau Anak Negekhi
Dang lagi wat di tuku

Say khadu bakhang khadu
Dang lagi ti olohi
Wat salah kham bu sadu
Sumbah jama Ilahi

Tabikpuun.. 

Bekasi, 14 Desember 2014. 

Hendri Semaka

wayak: "NGAJONG SANAK"

Temon hani sekiman

Sesol, mak khatong menna

Mangkung benni, bulamban

Mak lagi mingan lana

Tanjukh mak sepenyinan

Nutuk ijah say Tuha

Bulamban memainan

Siyang, ulang lajuna

Cawa ni hulun, temon

Dang ngajong lagi ngukha

Cuba'an ni melamon

Kantu mak kuat Guda

Takhu jak sekula'an

Mupuh sikop ni pudak

Ganta jadi sesolan

Cekhai, ninggal ko Anak

Umukh appai belasan

Pekekhan lagi buntak

Mandi mak butelosan

Gedah ni lagi sanak

Lunik, kukhang idokhan

Mangkung lamon tengliyak

Ya Anak, ya Inggoman

Makkung kahistu di Nyak

Mekhippak semakhahan

Ngedaku, benokh di Nyak

Kung ngedok kekhajja'an

Pedom dawah, say nappak

Puakhi, adek nakan

Dang sappai kuti nekhak

Melamon kekhugian

Kejuju ni di Anak

Ki ngajong khadu mapan

Umukh mak lagi sanak

Kalau cutik guda'an

Kelajuan mepanjak

Hinji angkah sekiman

Layin wat khetti tebak

Say buyun pelajakhan

Say jahal kayak campak

TABIKPUUN,..

Hyogo ken, 03 Agustus 2013

Hendri semaka

"PUISI - PUISI LAMPUNG" (empat)

"NYOMOKH"

Goh bakha, di awang-awang.

Di khatusan bittang, Niku bu inday.

Ku cigau Niku mak mingan..

Tangih haga ku akuk,

Kok cungak, Nyak mesikhi..

Kidang,..

Khadu sukukh ku lawi

Kena siakh mu, najin mak benni

Katti ni salok awan debingi. 

(13.Januari.2013).

"WAY LALA'AN"

Cukhup way lala'an, niku do saksi.

Katti sikam mak lagi pujama.

Gemukhuh mu mak mingan nyalok hiwang.

Khaccit uway mu, mak dapok ngiyos ko hati..

Dija,,..

kahud ku tekabok..

Tekhelop, laju mati.

Cukhup way lala'an, Niku do saksi

Tehanyut ni kahud jak hati.

(26.Februari.2013).

"KHUMASA"

Haga ku tinjuk, pudakmu.

Say gugukh dilom khilau ni uway.

Ku akuk.

Ku setik ko dilom hati..

Kidang Nyak mak kuwawa.

Siakh mu mak ubah bakha..,

Api gekhing ku say bella.

Nikanik khumasa. 

(26.Februari.2013)

"MANJAU MU BAKHA"

Payah Nyak ngapubida.

Hippa niku, sipa bakha..

Busanding lom danau no sawwa..

Ku akuk.

Nyak mak kedohol.

Kutti jawoh, induh dipa..

Kidang,,

Khadu hanggum ku sayya.

Bingi jo kutti manjau dija.

Ngubati tikham, kipak kah sementakha.

Semakkung awan nyemuka.

(26.Februari.2013)

"DINIKU ANGIN"

Diniku angin, Nyak pungatu.

Singgah ko pay, tikham say nihan sinji..

Dang ni luwang, kipak sang khekang.

Diniku angin, Nyak ngilu tulung.

Ngikhim ko khindu, say temondo..

Dang tittok najin sang pelok.

Diniku angin, Nyak buhakhap.

Dang cawa ko, kapan Nyak mulang.

Ki ngeba tiyan miwang..

Tagan tiyan mak pandai.

Menah, titip ku di niku angin.

(04.Maret.2013)

"PEKHCUMA"

Khinggom ni kahud ku say saka

Khadu jadi keliyang.

Pekhcuma niku bu indom..

Mati.

Tinggal kepunggukh.

Bakak na nikhah kah khua, tellu.

Tangih kebulung.

Kok nunas ya mak lagi.

Kung genok kodo tumbay..?

Niku monggom khanting, kepampang.

Dang pukhituk niku nuwakh ya..!!

Tagan, khubuh tenggalan.

(04.Maret.2013)

"HAYU"

Tiyak ni salju sebingi so, pagun mehili..

Jak hatok-hatok lamban.

say injuk mak bu kebuwak.

Batang-batang induh ka gelakh..

Mak kebulung, ninggam bekhanda.

Induh, dipa ipa ummad.

Hiyon tengi hayu khani.

Dija,,

Nyak tenggalan bu piyu ngison.

Selinggom di ketikhaman..

(12.Desember.2012)

"KUTTI PANDAI"

Sebenokh na..,

Nyak mak haga menok kutti moloh miwang.

Haga ku, kham pagun jejama lalang.

Kipak mak mingan sehahatang..

Kutti pandai..,

Menok kutti miwang, hatiku cadang.

Jawoh jak kutti, nyak kasakh suwang..

Kidang..,

Kutti moneh pandai..

Masani khadu togok.

Kipak biyak, kidang mundukh nyak mak dapok.

khilako Nyak moloh..

ki kutti lesoh, dang ni penok.

Cukup iling ko nyak tak khangok.

Ki ngeba sedih, dang tingok-ingok.

Lupa ko Nyak sappai genok.

Ku usung du'a kutti..

Say jak nambi ku sikhok.

kekalau, hiwang kham mak lagi manjang.

(07.Desember.2012)

TABIKPUUN,..

HYOGO KEN, JAPAN.

Hendri Semaka

wayak: "SUKHAT"

Lain nyukup ko sakhat

Bulamban khadu beni

Pahik sakik, ku sansat

Ngekhaba nyesol dukhi

Jak lunik nyak melakhat

Lain mak ni pandayi

Kidang hamu, lom pakat

Niat mak khubah lagi

Ngingok sumpah di Akad

Sina pegungan dikhi

Hulun tuha mu jahat

Nyak ni beduwa konni

Induh ki sangun niat

Anjak tumbay sakaji

Kahud mu khadu mawat

Menok nyak, niku beji

Kidang lain Malaikat

Nyak moneh lain Nabi

Najin sabakh bu lipat

Bu kukhang unggal khani

Ganta niat ku bulat

Bu janji, dilom hati

Najin sampai kiamat

Lijung mak moloh lagi

Khila dunia Akhirat

Dusa kuti mak lagi

Mula kuppik ko sukhat

Kantu Nyak mati dudi

TABIK

Hyogo ken, 03 Agustus 2013

Hendri Semaka

SEGATA: " INA "

Mahap ku diku ina 
Telaju Nyak busumbah 
Tikkah ku mak bu kena 
Lamon dusa khik salah 

Dakha balaq ni dusa 
Jak upi nyani susah 
Ganta ampai ku khasa 
Katti sungi kham pisah 
Haga ku silau juga
Kidang mak ngedok ulah
Jawoh hantakha Kita
Ku bidi mak ke agah

Busadu nyak di sapa
Ngilu tawai khik ijah
Payah haga putungga
Khituk nyak nyusun lakkah

Mak ku khasa nyemuka
Ingok nyak lagi lunik
Lagi pujama saka
Sunyin ku khasa bangik

Minjak bu imul du'a
Pedom bu piyu suppik
Wangga mu santokh waya
Najin di niku sakik

Ngalah segala-gala
Asal anak mu bangik
Jakhang nyappai ko wada
Kipak ya balaq henik

Khang nyappai ko kehaga
ya du'a khik penganik
Mak ngedok khasa buya
Pengahud mak sebinjik

Kilu ku di say kuasa
Niku melapang hukhik
Sappai citta kehaga
Santokh senang mebangik

Munyai mekhawan juga
Jawoh susah khik sakik
Cukup segala-gala
Pemakai khik penganik


Tabikpuun,..

Bekasi, 16 september 2014

Hendri semaka

Segata: " DANG MAKAI GA "

Dang lagi ni tetanya

Khappa kahud ku diku

Kidang mustahil dia

Cawa min khuwa tellu

Haga cawa Nyak, juga

Liyom di Hulun kaban

Umukh mak lagi ngukha

Buwok khadu kehuban

Mak ngedok say melana

Kahud bukhubah Nyuwoh

Manusia mak sempukhna

Jak khedik laju jawoh

Jeno pagi ti bujuk

Lohokh kham musau dada

Jak khalis khubah kiyuk

Andah ni cutik wada

Nyuwoh dang makai nihan

Injuk mak dapok puput

Kantu ni khubah tuhan

Jak nyuwoh laju kahud

Kok tungga haga mutah

Cawa petika asakh

Menggekhib lassung khubah

Jak bejji laju sasakh

Ijah anjak say tuha

Taway jama Kham tumbay

Lom hukhik dang makai 'ga'

Ilmu sedong, ti pakai

Dang bu puhum di baccong

Dunia mawat lana

Bacak segala nyedong

Lebon mak balak haba

Ki ajal togok kanah

Hiwang mak setakhuwan

Bacak pilih di tengah

Lebon, kham mak luwangan

Dang unyin na ti sumbah

Ki lain jama Tuhan

Ketubang lebon tegah

Kham mati kekhayangan

Mula temondo nihan

Lehot say tuha tumbay

Kenyin dang jadi haban

Bacak nyedong di guway

TABIKPUN,..

Bekasi, 16 Mei 2014.

Hendri Semaka

SEGATA: " KUMBANG"

Mingan kodo Nyak inday

Nyekhumah ko kehaga

Ku kubukh anjak tumbay

Nyak khabai kena wada

Halok niku mak panday

Gekhing ku lain hada

Khadu benni ku tinday

Penyin ku khadu saka

Ku penah khani sawai

Kahud mu wat nyemuka

Ngelimak bulup khabai

Khumasa mak kedega

Niku kumbang di pekon

Mekhum togok di tuku

Demon saka ku simpon

Sangking Nyak sikhi diku

Debingi manjau dangon

Pedom kukhuk hanipi

Mak dapok ku lupa kon

Bukak cawa Nyak sikhi

Umpama Niku enton

Nyiakh nyilaw ko mata

Khamah hulun say demon

Jengan nyappai ko citta

TabikPUUN,..

Bekasi, 11 Mei 2014

HENDRI SEMAKA

segata modern: " LISTRIK "

Lappu damakh mak lagi

Minyak tanoh nyemuka

Patromax jadi gatti

Alih ni ya lentikha

Maju ni pembangunan

Listrik khatong nyemuka

Togok di pemekonan

Lain ikah di Kota

Buhung ki togok pullan

Listrik di ipa-ipa

Pak tattang kelom bulan

Pagun wawwah dunia

Tipi dalih radiyo

Mak lagi makai Aki

Nyonjong makai Miyako

Khayoh mak laku lagi

Lappu minyak tesimbin

Cadang tepik di tuku

Kejuju ni wat lilin

Tanda dunia maju

Dakha senang lom hati

Tekhang isi dunia

Mak sekeloman lagi

Bangik segala-gala

Khadu sipat kham inday

Mak genok khisok kukhang

Lupa di kelom tumbay

Ulih biasa tekhang

Kak Listrik mati tegah

Bingi kham sekeloman

Mekhippak haga makhah

Mutak matikh angonan

Kak nyonjong unggal khani

Mak lagi makai kayu

Ki listrik tengan mati

Isi majic com bayu

Kelom di ipa-ipa

Pemekonan kham mangi

Haga nyuwah lentikha

Minyak tanoh mak lagi 

Radiyo dalih tipi

Mati mawat bunyawa

jak tuyuk togok upi

Ngehamma mak nyuakha

Bangik ki say kebayan

Mingan tiyan pedom geluk

Lom kebik se'ayitan

Sejakh cukut khik culuk

TABIKPUUN,..

Bekasi, 13 Mei 2014

Hendri semaka

segata: " KHASA "

Mulli bu takhi sumbah

Senyum na helau nana

Jak atas togok dibah

Cella mak nappak diya

Say menok khatong suka

Khagah dalih mekhanai

Gekhing khatong nyemuka

Mak nunggu jimmoh sawai

Mak ubah ni kinjuk nyak

Menok, mak kedip mata

Khasa demon ku minjak

Khatong mak ku khencaka

Di niku khang ngelimak

Nyekhumah ko kehaga

Kidang ki mak dapok mak

Sejakh nyenang ko mata

TABIKPUUN,..

Bekasi, 04 Mei 2014

Hendri Semaka

Segata: '' SANAK BAKAS ''

Ya Allah humma deppa.

Sanak bakas ganta ji.

Buwok kejung tak dada.

Busubang cuping kikhi.

Nangguh nyomokh sekula.

Bandung - Jogja kilu ni.

Haga jadi sarjana.

Kekhja pegawai negeri.

Unggal kak musim lada.

Atawa musim kupi.

Jak pekon ngikhim juga.

Transfer liwat BNI.

Maklum ya anak tuha.

Ti-tutuk kahaga ni.

Ngilu kah lima juta.

Pitu juta tikenni.

Sai tuha khasa bangga.

Anak 'sekula tinggi'.

Mak panday sai sekula.

Midokhan unggal khani.

Katutuk ni narkoba.

Ciwe'an gatti-gatti.

Kebangi'an dikota.

Lupa bapak kham tani.

Ngakuk sai bayakh khua.

Hulun tuha kham bani.

Say penting sanak waya.

Pekhettok ti tukhuti.

No 'kawasaki ninja'.

Tanno khadu mak lagi.

Tangguh pakai sekula.

Yamula na tibelli.

Duit semester bella.

Tibelliko 'black berry'.

Khuppok khadu wisuda.

Kham pagun njuk goh nambi.

Kihaga khajjo juga.

Khappa haga lajuni.

Sabah kebun kham bella.

Cadang sanga muakhi.

Kihaku mulang khayya.

Kimawat bakal jadi.

Kasihan hulun tuha.

Tinggal khayang ni lagi.

Haga temon sekula.

Dakkung pay main mully.

Ki khadu jadi 'jamma'.

Mully lamon say 'nyuwi'.

Umukh jo mak ki lana.

Bukukhang unggal khani.

Ngandal ko hulun tuha.

Khadu mak zaman lagi.

Inuman khik narkoba.

Guda'an zaman sinji.

Musuh nekham jejama.

Dang sekali, nyubani..!

Jaoh jak hulun tuha.

Mak ngedok nge-jagani.

Kidang, ingok say kuasa.

Pengawal say 'hakiki'.

Yamula ni dang lupa.

Sembahyang dalih ngaji.

Niat lapah sekula.

Dang nyippang kanan - kikhi.

Pasti hanggum say tuha.

Bu-titel gellakh kutti.

Mingan nyalon kepala.

Atau jadi mentekhi.

Hanggum di sanga makhga.

Sennang minak muakhi.

Paling mawat tiyan bangga.

Jama kutti, puakhi.

Tabik pun....

Bekasi, 12 maret 2010.

Hendri Semaka