segata: "NANGGUH MENA"

Kilu ku diku Adik

Mahap ku di tekhima

Khumasa sanak sakik

Mula Nyak nangguh mena

Hukhik mu liwan bangik

Cukup segala-gala

Pemakai khik penganik

Anak tuha hahana

Abang, Adek ku khamik

Sina jengan ku ngaca

Ketutuk ni mak ngemik

Kukhang segala-gala

Lain ki Nyak sebudik

Ajo ampai ku khaba

Kidang haga khepa pik

Saking kahud ku sia

Pandai Nyak, Niku sakik

Kidang mak ulah dia

Hakhap ku dang ni binjik

Pengahud mu say saka

TABIK

Hyogoken, 9 sept 2013 

segata: ''UKHAWAN''

Kutekhima Ukhawan mu

Lepas asakh khani Minggu

Pita kuning, Warna biru

Lambang Sigokh lekuk pitu

Kubaca Lom ukhawan mu

Mak pekhcaya di hatiku

Gambakh kundang mu say baru

Cecok di gekhil gambakh mu

Ku hija ko ukhawan mu

Khabai kantu salah tuju

Kidang temon, Anjak niku

Ngukhau khatong di Guway mu

Hancokh khasa ni hati ku

Basoh, Sukhat ukhawan mu

Hiwang, haba mak bukhadu

Niku kundang, ngampalaju

Ku khatongi ukhawan mu

Najin biyak di hatiku

Ngeliyak niku Ngemaju

Jama kundang pilihan mu

Busanding do, kuti khuwa

Lalang waya, lom kelasa

Nyak mejong, di tuku dija

Miwang khik bu kikhim du'a

Moloh angon ku dinana

Lagi masa Kham pujama

Janji mu haga setia

Bang kikhani Cawa hapa

Najin lamon hulun cawa

Gekhing mu mawat sepikha

Mak nihan ya, ku khekhaba

Ulih sangking kahud sia

Kantu payu anjak ganta

Kilu ku di say Kuwasa

Du'a ku mid Kuti khuwa

Hokhek senang, selama na..

TABIK.

Hyogoken, 14 September 2013 

segata Lampung: "LAKUN HUKHIK"

Lakun Kham hukhik

Semapu di Dunia

Mak nungga bangik

Ki mawat kham Usaha

Balaq khik lunik, mak salah ni ti cuba

Ki guwai betik

Kekalau ya buguna

Pak ulih cutik

Kidang ya mingan lana

Akik ya gagik, pagun kitik demon ya

Lain te'nyattik

Halal hani Agama

Bangik ti kanik

Khasa ni sedop nana

Pak kupi pahik, kekhasa makai gula

Ki Jak ngebudik

Ngakuk Hak ni, keduwa

Nganik lom kebik

Cungak khilong kham juga

Bunyi Cacikhik, Injuk suakha jamma

Cawa dang Nyengik

Ti pikikh semangkung na

Ki hulun sakik

Tilah kham mansa dusa

Pak balak Henik, pasti wat balosan na

Ki nungga bangik

Dang santokh nebuk dada

Bubagi di Khik

Indai say mak kuwawa

Najin ya Cutik, Halok balaq khetti na

Hani kiya'i (k)

Say paham di Agama

Dang ti babinjik

Pengeni di keduwa

Tagan ya tippik, Amal kham kak dinana

TABIK.

Hyogoken, 15 september 2013 

segata: "MULLI SIKOP"

Sapa do, niku adik

Pudak mu helau nana

Tutukh cawa mu betik

Nyani Nyak butetanya

Nyak mikikh, bela angon

Hanipi api Nyata

Mak dapok ku ucak kon

Cawa di ujung emma

Tingkah laku mu helau

Sikop moneh di wangga

Nyani hati ku jajau

Anjak muaq kham tungga

Sikop goh Bidadakhi

Lom wakhahan khik lagu

Kok menok, Nyak mesikhi

Tangih haga ku tagu

Goh siakh Matakhani

Nyani silau di mata

Najin tungga mak benni

Lom hati hanjak juga

TABIK.

Hyogoken, 2o september 2013

segata: "LABUHAN BAKAU HENI"

Kupenah niku kundang

Moloh ngebatok janji

Khadu saka nyebekhang

Di pulau jawa dudi

Labuhan Bakau heni

Mak puput di penah ku

Kapal sandakh buganti

Isi ni lain niku

Kutanya di Dekhmaga

Api nihan ngebani

Hamu, tunggu nyak dija

Kidang Niku sebudi

Halok kahud mu tumban

Di Pulau jawa dudi

Ku tahan mak kebaban

Miwang Nyak delom hati

Da ikin Nyak di ladang

Ki hujung ni goh kheji

Mulang ngebatok hiwang

Penah ku mak bu kheti

TABIK

Hyogoken, 28 september 2013

segata: ''LACUKH''

Api do lacukh, Dunia khadu tuha

Khadu bu umukh, semapu di isi na

Ki payah ngukukh, tejajau kham andah na

Hacak jahik bang cekukh, maklum khupa mak bida

Tungga mekhanai, ya gagah tutuk gaya

Laju mu indai, mengan pedom pujama

Pedom ngekhesai, minjak miyoh jejama

Say nyani Nyak mekhabai, nyak menok demu hana

Mubil bugikhok, nyumang anjak pekhwatin

jamma khua budakok, selinggoman lom kain

Muaq ni sokhok, lom hati mawat yakin

Bakhong khadu ku penok, tyan khuwa mulli unyin

Ki manuk lacukh, pagun daging ni laku

ki jamma lacukh, budusa khadu tantu

ki mising bucukh, ubat ni pucuk jambu

kidang penyakik lacukh, bu tubat khik pengatu

Ti liyak-liyak, ti penyin ko papatan

Mawat ya panjak, maklum guda ni sitan

Tagan dunia kikhak, asal dang nyimbak badan

ki wat ti liyak jukhak, khetti ni ya luwangan

Haa..haaaaaa......

Naudzubillaah,,

TABIK.

Hyogoken, 28 september 2013