''GEHASA ANGIN SYAWAL''

pemuput ni puwasa togoh moneh lebakhan ingok di unyin dusa lamon ni kesalahan Kusilau mak kesipak lamon nihan halangan ingok di emak bapak angon khasa luwangan Butakbir dija dudi hulun lapah sembahyang kuti mak dapok ku 'di mula hiwang ku manjang Mati bangik ki ngulang pujama goh say khadu anak mu mawat mulang mak ngidok khang busadu Hiwang ku khadu bella luwoh pakai budamu kilu mahap khik khila busumbah di cukutmu Bubisok nyak lom hati luh kekhing tinggal tudah ingok Nyak jama kuti basoh uncuk sejadah Di angin syawal pagi titip tikham kudia sakik ku dang ni bagi tagan nyak say ngandan ya Liwat takbir ku Robbi tulung jaga pay tiyan layau ku dang mubagi tagan ku sandang sayan Du'a ku santokh munyai 'mak bapak seunyin ni kisedih tulung ungay hati dang sampai mangi
Tabikpun,..
Pagaralam, 06 Juli 2016

Hendri Semaka

Segata: ”SUPIR”

Lamon hulun say cawa Ki Supir suka mampir Kinandi sangun khiya Wat penumpang Nyak parkir

Kuteduh sangun temon Kidang salah kalimat Najin nyak setatemon Say pekhcaya ni mawat

Andah ni salah hija Salah khetti kalimat Kipak khalis khanglaya Say pekhcaya ni mawat

Lain pinsan kucuba Nyippok sumang hakhungan Kidang Nyak moloh siba Supir jadi pegungan

Tani khadu jak nyikhang Mak ubah bugaduhan Lain sai-khuwa khang-khang Nekhus ko kelajuan

Lain cutik di bilang Sakik nihan ku khasa Pecoh ban, kena tilang Macet khadu biasa

Anak Inggoman tippik Jakhang takhu di lamban Mak kuppul di say khamik Kilayin penayuhan

Gudaan lain lunik Sekejung ni lapahan Ngulangko duwit Cutik Tikhah anjak setoran

Khadu pay badan buya Bolok moneh pikikhan Kekala timbul suya Cak kheji Kehukhi’an

Ujian dalih guda Bumacom ni Cuba’an Lamon hulun ngewada Nyak khelop kasakh tumban

Penumpang ni mak lamon Sahingan kasakh khamik Nayah hulun mak demon Senggitah Nyak mak ngemik

Wat nekhak salah cutik Payah haga ku dandan Puhayak pudak betik Kidang jahal di kudan

Nekhak cuba’an cutik Balaq nihan sesolan Pagun khisok ti binjik Nyak tuppak kesalahan

Salah santokh ti bimbing Mahap payah nekhima Liyom lapah bu ikhing Balaq nihan di suya

Nayah say mak pekhcaya Najin kham setatemon Mak nungga pudak waya Say nyuwoh ni melamon

Kilu ku di Say Kuasa Kedau unyin ukhusan Mahap segala dusa Cubaan cukup pissan

Jawoh ko unyin guda Lalika khik Cuba’an Togok citta kehaga Munyai dalih mekhawan

Niku Jengan bukilu Khang tuppak ku busippuh Khalis ko lapahan ku Bulayakh togok labuh

Tabikpuuun,..

Bekasi, 28 April 2016

puisi: ”DISUDUT AKU TERSADAR”

Aku..

Lena dalam gemericik air

Lelap dalam buayan angin

Lalu segala tentang mu menghiasi mimpi

Kau.. 

Satu dari satu yang mengambil cintaku dengan paksa 

Merampas kesadaran ku dengan goda

Lupa onak yang sedang kau semaikan

Tak sadar akan perangkap yang kau sebarkan

Kuraih tangan mu yang kau ulurkan dengan gemulai beriramakan cinta

Kau rengkuh kesadaranku dengan ribuan dawai asmara

Apa Aku salah..? 

Aku berdiri menari bersama mu dalam bahagia bertirai fatamorgana

Tapi tangan mu perlahan kau lepaskan 

Irama mu kau hentikan 

Lalu putus dawai mu secara perlahan

Aku bukan khilaf... 

Hanya karena angan ku terlalu tinggi untuk ku raih

Tidak juga Aku sengaja... 

Karena mimpi ini tak pernah kureka

Aku tersadar... 

Gemericik air tak pantas kudengar 

Aku terjaga.. 

Yang kau hembuskan bukanlah angin syurga

Engkau purnama di atas sana 

Yang datang mu terkadang sirna 

Cahaya mu hanya membuat Aku terpana 

Di dasar ini Aku hanya bisa memuja

Pergilah dengan segenap asa tentang mu Menjauhlah dan bawa semua buayan angin syurga mu 

Biarkan Aku disudut ini dalam sadarku

TABIKPUN,..

Hyogoken, Japan14 November 2016

Hendri Semaka

NYAMBAY (2)

* Assalamualaikum Nuju Adek say disan Kekalau hati hanggum Helau penekhima’an Mingan kodo Nyak pandai Sapa gelakh mu Adik Buhakhap jemoh saway Kham mingan kasakh khedik ** Ngehayak isi Talam Bebuwak angkah cutik Wa’Alaikum salaam Ki sangun niat betik Nekhima hati khilau Niat khasan say samik Kinandi Nyak mak helau Mak gegoh di say khamik * Lain dah ano payau Kiya bukhupa bumbun Kah Niku nyani layau Najin sikop telambun Ku khiyap sangatukhap Ku pessi kinjuk kupi Niku jengan buhakhap Jak khatong di hanipi ** Mekhanai juga lamon Say kukhuk di kelasa Kah Abang say ku demon Anjak muaq ku khasa Ibakhat ni memata Way khilau kakhi nimbuk Jengan nyappai ko citta Hikhang hatiku nyambuk * Gatol kayu jelatong Injuk mak ngedok khega Kantu say bakhih khatong Tulung pay dang ni gaga Way khilau dang mu tontong Bacak pakai budamu Malam Ahad nyak khatong Manjau Nyak mid lamban mu ** Payu Abang ku penah Manjau do mid lamban ku Kak mamal ahad kanah Adek say dija nunggu Du’a penutup kata Alhamdulillah payu Hati kupasang kuta Say bakhih tagan liyu TABIK,... Bandar Lampung, 11 Juli 2016 *: Mekhanai **: Muli

NYAMBAY (1)

* Assalamualaikum,.. Tabik jak sikinduwa Nyak nengah kilu maklum Haga busumbah cawa Liyom ku lain cutik Kidang mak ulih diya Nyappaikon lehot betik Jak say tuha khik baya Helau penekhima’an Kuti manjau kelasa Ngehayak pelambakhan Nyambay di sikam dija ** Waalaikum salam Timbal anjak say dija Kilu mahap jak sikam Mid baya togok khaja Anjak semapu pekon Jak bumacom di Makhga Khatong ngebatok angkon Bupedatong kehaga Alhamdulillah payu Hanjak Nihan ku khasa Lain angkah taliyu Nyomokh nutuk kelasa Anjak selang semintang Mekhanai Batin makhga Kantu wat Bintang tekhang Wat judu sikam dija * Muli batin khik baya Muli Mekhanai pekon Khadu puhayak sia Ngilu penghakhi angkon Kantubang wat say demon Wat niat penghakhopan Kilu ku mak kilamon Tulung tagu say sopan ** Payu sikam nekhima Segala di atukhan Ki sangun wat kekhana Sampai ko, Nyin ti dandan Jama se-unyin inday Ano lehot jak baya Khadu ni keni panday Kilu dang balaq suya * Payu Minak muakhi Sunyin ni Tamu, Baya Acara Khadu kakhi Tinggal nutuk khenglaya Pemuput ni Kalimat Penguncuk ni pengilu Kantu helau ni mawat Mahap Nyak bu-Pungatu

Jama seunyin Puwakhi Muli dalih Mekhanai Nyambai di bingi sinji Bismillah Kham ti mulai TABIK,.. Bandar Lampung, 11 Juli 2016

*: Sambutan jak Baya (biasa ni Kepala mekhanai). **: Sambutan jak Tamu (Biasa ni Mekhanai Batin).

wayak: "MULI"

Semangkung buganiak.

Bismillah ti awwali.

Ajo kusani wayak.

Nuju mid kuti muly

Kantu wat adik nakan.

Astawa anak muly.

Sinji sekadakh pesan.

Ngakalau wat gunani.

Yukidah lemong sakhi.

Melatap di kukusan.

Najin mak nalom nakhi.

Dang hingga bebakasan

Dang hingga bebakasan.

Kittu lamon mak suka

Bekhani sepagasan.

Sina muly butakha.

Sina muly butakha.

Astawa mulli bani.

Ki kuty gegoh khiya.

Muly tuha lajuni.

Nyak coccok niku mejong.

Marok kham sekheloman.

Bacak belajakh nyonjong.

Jak ngopok kikhi kanan.

Jak ngopok kikhi kanan.

Sina lakun mak buyun

Belajakh sepenyinan.

Dang nyingkal ki tikayun.

Dang nyingkal ki tikayun.

Dang munih khibok kuwol.

Hukhik dang ngalalakun.

Nukhut ijah dang pingol.

Lapah kham mid menggala.

Ngebelli tudung saji.

Khanggal khanggal sekula.

Dang lupa munih ngaji.

Kuti muly dang liyom.

Kak cappukh di say khamik.

Belajakh nyin menalom.

Sunyin guway say bettik.

Ngawil di batu tegi.

mansa iwa seluwang.

Ganta mak jaman lagi.

Muly beboh pukhiwang.

Dang kuti khagu khagu.

Sunyin sikam mekahut.

Kantu mekhanai nagu.

Dang nimbal ngambakhucut

Dang nimbal ngambakhucut.

Ngeletop buang muka.

Kantu makhanai singut.

Nyepok tiyan 'bebukha'.

Lehotku khadu bella.

Akuk kiwat gunani.

Lain kik hingga tuha.

Sekadakh naway kuti.

Sekadakh nawway kutti.

Puakhi adik nakan.

Kittu wat sakik hati.

'kilu happun' nyak tuhan..

TABIK.

Bekasi, Januari 2010.

segata: "JANDA KAYA"

Temon ya jambu Landa

api ano sekhkaya

Nunang ko bebay janda

Pak Janda kidang kaya

Badan ni handak nana

Helau khik bekhak pudak

Anak angkah hahana

Ya muli ampai cakak

Umukh ni mak ki ngukha

Khua pak kidang jukhak

Sapa ya say menok na

Tilah hati ni sakhak

Mubil ni uwat lima

Say di nyak warna handak

Lamban khupa istana

Sabah kebun ni bekhak

Kipak mawat kekhajja

Duit semapu anjak

Unggal minggu cekhamma

Hinno say demon di nyak

Mak akhu nyela wada

Duit ni santokh luwah

Duli pak umukh bida

Pakai nyampi ko galah

Nyak bukundang jama ya

Sakhat ni sangun mudah

Debi sabtu nyemuka

Debingi na tesekhah

Halok kuti butanya

Dipa bakas ni kidah

Khadu kejung cekhita

Mangkung kukhuk lom sukhah

Bahasi ni Agama

Ki bebai Almarhumah

Kena kasus Narkoba

Hukuman gantung galah

moloh luwot cekhita

ki hana kita nyukhah

cekhita sikam khuwa

lajuan ni wat dibbah

Kidang tuwon bedusa

Khik moneh kantu tulah

Kah setahun pujama

Sikam khua bu pisah

Jak BNN Jakarta

Utusan pemekhittah

Jak GRANAT khik jak POLDA

Khatong mid sikam makhah

Unyin hakhta ni sita

Kipak say mawat nikhah

Hukhik kasakh sengsakha

Nyak di vonis busalah

TABIK.

Malam minggu Hiyon, 29 september 2013

segata: "MOLOH CAKAK"

Tinggal pay kuti sayang

Bapak lapah bubukak

Bagian kita malang

Kehukhi'an kung panjak

Usaha kukhuk Gunung

Mak melamon pemenok

Sakik Kham lain tanggung

Mak goggoh jama khoppok

Benni mak nunggu pekon

Tuha dilom Las bani

Sakik ga Angon-angon

Ki telibak di kutti

Anjung nunggal lom pullan

Jawoh jak inday kunsi

Bingi ku tontong bulan

Kasakh lesoh di hati

Mak bunyi kattu Samang

Dunia hiyon tengi

Kani'an Talos, Gedang

Alih ni pajak putti

Bias tenyappukh Jagung

Kelalah Gula Minyak

Pajak Sekhang khik Tiyung

Ki Leju, gatti Kulak

Mejawoh na lapahan

Ku bidi lapah cukut

Togok moneh lebakhan

Sakik, makkung telikut

Mulang tukhun jak pullan

Tikham di kutti Anak

Dilom pekon tenggalan

Ngekhasa kalah ungak

Kilu ku, dang ki miwang

Jo Bapak moloh cakak

Lain kutti ku buwang

In hukhik kutti Bunjak

Adik mu tulung babang

Nukhut ijah ni Ina

Ngaji mu dang mu buang

Najin mawat sekula

Dang lupa ko Sembahyang

Bukilu di Say Kuasa

Buka hadap Nyak mulang

Kalau kham pagun tungga

TABIK

Hyogo ken, 24 November 2013 

Wayak: "LEHOT"

Ija niku Anak ku

Nyak cawa tengis ko pay

Penyin ko pay lehot ku

Lehot jak Tamong tumbay

Allah jengan bukilu

Asing gelak gumelay

Dang lupa di say Fardhu

Pakaimu jemoh sawai

Di niku, Nyak pengatu

Betik-betik ko guwai

Ki jak cawa, setunggu

Dang cawa lillih lubay

Dunia kasakh maju

Pilih-pilih do inday

Dang Pisang Ambon hamu

Ki sangun Putti Jelay

Injuk hani lom lagu

Belajakh ki mak kelai

Dang gawit ngukkui hulu

Butanya ki mak pandai

Tak ija pay lehot ku

Kalau dapok ni pakai

Du'a tunyin mid niku

Mekhawan dalih munyai.

TABIKPUN,,

Hyogoken, 24 Maret 2013 

Pantun Pagaralam: "RASAN ILOK"

Njual kawe ke Tanjung karang

Temalam kudai di Batu raje

Injit kakang nga ading suhang

Lah lame nia

Njual lah kawe ke Tanjung karang

Temalam lah kudai kite di Batu raje

Injik lah kakang nga ading suhang

Lah lame nian kupendam ghase

Alangkah jauh nak mbeli rokok

Rukok dibeli di duson Prabumulih

Di tukar kebau sepuluh ikok

Masih ka ading ye kakang pilih

Bekayuh sampan di Sungai Musi

Dik teghase pule lah sampai ke ulu

Kakang ngicik ni kanye ngapusi

Nak ngajak dengah ke umah penghulu

Dik kan lah ade ayik di Ogan

Amu kemarau panjang di Pagaralam

Ku ghase kite lah cucok nian

Ibarat benang nga kain sulam

Oi Gunung dempo, Gunung Telunjuk

Masih kan jauh pule Gunung Seminung

Malam lah aghi dik pacak tiduk

Te ingat ading, kakang termenung

Di lubuk buntak menjale ikan

Balik la lagi kite ke dusun Plaju

Rasan iluk, lah kusampai ka

Dik di terime,, aku nak laju

Heee...

Hyogo ken, 26 Maret 2013

Hendri Semaka

Segata: "GISTING"

Yukidah pasakh Gisting

Dunggak ni Kuta Dalom

Badan basoh di hiting

Mid hayu mulang manom

Mak jawoh anjak Gisting 

Wat Pekon Banjakh Manis

Biyas tinggal sang catting

Gula ni khadu nimbis

Isi ni pasakh Gisting

Hayum, Lepang khik Jagung

Pikikhan kasakh pusing

Anak Inggoman lijung

Debah ni pasakh Gisting

Gelakh ni Tulung Kistang

Lagi kena pukhising

Khatong khik nagih Hutang

Toko Uting di Gisting

Di hadap, ilung medoh

Lagi mejong di sikhing

Ni tayakh babbai moppoh

Si Gisting Pasakh mikhing

Ngison ni mak kahingga

Nunang ko Muli khinying

Bang Janda nganak khuwa

Midokh mid pasakh Gisting

Ngebelli Candung Kawik

Hulu motokh goh Gasing

Ubat ni Kupi pahik..

Tabik,,,

Hyogoken, 28 Mei 2013

wayak: "MOLOH"

Tinggal pai kutti sayang

Nyak lapah halok benni

Dang nemon kuti miwang

Kantu Nyak lemoh hati

Kehukhi'an kham malang

Mula hinji tekhjadi

Nyak lapah moloh midang

Jawoh jak unyin kutti

Andan ko do pai Sayang

Anak kham lagi upi

Kantu jemoh ya miwang

Dipa Bapak ku, hani

Ajo ku pikko hinjang

Indai ni buhanipi

Kantu tiyan gumakhang

Tulung piyu ko lawi

Induh kapan Nyak mulang

Kung tantu di musim ni

Bulan makin mu bilang

Kenyin geluk buganti

Tabikpun,,

Hyogoken, 26 Desember 2012 

wayak: "SIYANG"

Niku mena cakak jung

Nyak menah di pesisikh

katti lapah mu lijung

Lain hati mak watikh

Nyak digok niku conggok

Siyang jadi pilihan

Khusuh makin ngelagok

Gelakh ni bulambanan

Anggop ku cawa hada

Bang, kikha setemonan

Melok buwok di paha

Kacai sunyin babangan

Bu-jukung patoh katikh

Bukayuh culuk laha

Di Nyak, niku dang watikh

Pikikh ko anak kita

Mak sedih kodo niku

Anak Kham gulik miwang

Minjak, dipa emak ku

Pedom, santokh gumakhang

Cawa ku saka khadu

Nutuk Nyak, tilah susah

Pedom mawat bu-piyu

Mengan bu-suwa uyah

Kidang cawa mu payu

Injuk kuwawa nemah

Bang niku, kah teliyu

Kah khatong nuppang singgah

Payu ki khena hamu

Duli sikam tikacai

Halok khadu tenemu

Bulamban, mak bu-bebai

TABIKPUN.

Hyogoken, 05 Januari 2013.

Wayak: 'SANAK MULI'

Kilu mahap puakhi.

Utama disay tuha.

Ulih anak ku mulli.

Khanno do, lantakhanna.

Tabik pay indai kanca.

Jama muli khusus ni.

Kham jejama ngebaca.

Segata adi-adi.

Muli di zaman ganta.

Lamon mak ngedok sikhi.

Nyani liyom say tuha.

Kaban ahli puakhi.

Cawa mawat ti tata.

Sehahaga ni hati.

Kinandi lunik saka.

Kukhuk sekula ngaji.

Jak jawoh goh lelaja.

Buwok buntak buponi.

Ipon bukawak baja.

Tanggai bu-warna warni.

Androk sekhamman paha.

Mata silikhan bani.

Kawai ala Eropa.

U Can See, istilah ni.

Ngeliak indai gaya.

Nyomokh moneh dihati.

Kinandi hulun tuha.

Lamon mak kuwawani.

Najin kipak ya khia.

Mawat ki khanno unyin.

Pagun melamon juga.

Muli buyun, bupenyin.

Di hulun tuha sayang.

Kahud di adik nakan.

Ngaji dalih sembahyang.

Nutuk ijah ni Tuhan.

Bangga tian say tuha.

Hanggum minak muakhi.

Ki kuti gegoh sina.

Mekhanai gulik sikhi.

Betik ki tian cawa.

Muli mekhanai akkon.

Santokh bu pudak waya.

Jadi kumbang di pekon.

Khadu pay antak ija.

Wayak kham 'sanak muli'.

Kantu wat salah hija.

Kilu mahap nyak lawi.

Tabikpun..

Bekasi, 30 Juli 2012.

Wayak: "LESOH"

saka angon ku lesoh

katti kham sejawohan

santokh nyak khambak luwoh

miwang nenggakhah bulan

luwah gakhang nyak magoh

miwang nyak ilung kudan

sakik ni tikham jawoh

se~jam khasa ngebiyan

kapan khamtungga moloh

nyekhita lelaga'an

ilung unggak, ilung doh

kham lapa setawitan

enggok nyak nunggu jemoh

tikham ku mak ketahan

duli kepi ku patoh

nyak langui lelegohan

Tabikpuun, 

Hyogoken,26 desember 2012

Wayak "MEKEKHAK UMBAU MANUK"

Kapan goh kuti disan
Kehukhi'an mebangik
Sekheba kecukupan
Ya pekakas, penganik

Ni junjung goh jukhagan
Hulun mak bani cukik
Unyin tekhok kenalan
Pak sai, mak ngedok tepik

Balak moneh di lamban
Isi ni lain cutik
Dakhak mak keculuk an
Mak akhu nungga sakik

Mulang jak memidokhan
Bato'an lain cutik
Dibbah jak mubil sidan
Naban sendali ngetik

Mak putuk di udutan
Kehaga tinggal nunjuk
Semapu di Inuman
Betoh kekakhi mujuk

Sikop moneh inggoman
Anak gulik pugemuk
Metuk umbau dekhuyyan
Mekekhak umbau manuk.




Tabikpuunnn..

Hyogoken, 07 Januari 2013

Segata: KORUPSI

Ajo wakhahan nyata

Cekhita khadu benni

Anjak Indonesia

Negara makmur hani

Dija khoppok segaga

Selelamon korupsi

hakim, menteri, jaksa

D.P.R khik pelisi

Camat mak jawoh bida

Bupati kejujuni

Gubernur khanno juga

mak nutuk, kantu khugi

Mawat hacak ki Da'a

Ano ya khadu Haji

Asal sebagi khua

sai menna, Da'a dukhi

Duli Rakyat sengsakha

Say penting latap laci

Duit khibuan juta

Bujejekh mubil Mercy

Jak zaman orde saka

togok di Repormasi

Mawat ki ngedok bida

Goh kuyuk jama kaci

Wat do, sai, telu, khua

Koruptor kukhuk Buwi

Kah ti denda hehada

Ti kukhung mak ki benni

Bela duit negara

Ngukhus ko mekhakheji

Nyiwa Jet mit kolombia

Nyussung jamma budasi

Asal haga khik cawa

Jama kaban pelisi

Mulang ya sehahaga

Nonton Tenis di Bali

Ki guwai betik juga

Bano mansa Remisi

Telu tahun, khencaka

Kah khua ti jalani

Ki, Presiden kham hiba

Dapok ya ngena Grasi

Kipak muak na khua

Setahun, paling benni

Mula mak bella-bella

Jekha mak bakal lagi

Korupsi bangik nana

Mati sai, lima jadi

Sapa do say kuwawa

Nunjuk ikhung, ki bani

Tilah hengas ni bella

Mak nunggu jemoh pagi

Saka, uwat di K.P.K

Mamak Susno duadji

Si calak jak Sumatera

Kantik ni Antasari

Asing tah, ilung cakha

Nyin dang tiyan kebunyi

Ti sogok ya mak haga

Ti pahau pakai muli

Kadang kham butetanya

Cak hukum gegoh kheji

Acak mak gegoh China

ti timbak laju mati

Haga ni, kenyin jekha

Uwat ko Hukum mati

Kidang kham usul khena

Komnas H.A.M, nunjuk jakhi

Tekokkoh mak ti khasa

kasakh cutik, say bani

Mekhabai mati ngukha

Cukkilan, istilah ni

Ki khajjo-khajjo juga

Temon moneh injukni

Hani tiyan say tuha

Asal dang Kham goh, ami...

Tabik Puun...

Hyogoken, 21 maret 2013

"PUISI BERBAHASA LAMPUNG" (lima)

"SUKHAT PEMUPUT"

Kutekhima sukhat pemuput

Say ni tulis di kekhattas kehanja'an

Budawat senang hati

Ku hija lelegohan

Ni tengot Inday ku Luwoh

khik kanca ku Sakik hati

Cutik, kidang sakik..

Ajo dia sukhat pemuput

Tanda gekhing ku mak lagi

Ajo dia sukhat pemuput

Bukti Kahud ku khaduwi

Ajo dia sukhat pemuput

Jejimmoh, mak kia khatong lagi

Ajo dia sukhat pemuput

Ku hakhap, ikin Niku ngebalos ni

"NIKU"

Niku,,

Say ketellu ngusung kehangguman mu

Bu pedatong janji sengikok

Niku,,

Say kekhuwa pagun makku

Nganik Bebuwak Kahud, Nginum Way sayang

Say ku undah ko

Niku,,

Say nambi nangguh tegah, Mulang geluk ngebatok belatuk

Nikhah ko khawang benna

Kebianjo,,

Niku lapah di hadap lamban, Ni arak jadi kebayan

Dija,,Nyak ngekhikkosi khawang benna.

tenggalan 

"KUBUKH"

Khadu puput khasa ni kahud

Ku kubukh di pecuccu'an Kenyuwohan

Ku timbun makai tanoh sakik hati

Ku baca sukhat-sukhat ngelagok

Semakkung ku tanom, batang lupa

"SELO'AN"

Tumbay,,

Say Tuha, say ngukha, bakas khupa na

Buselo'an mid dipa-ipa

Duma, midokh, pujama di kelasa

Besi Tuha, besi ngukha semapu khupa

Di Tengah khang na. mak ki asuk ga

Mak liyom, mak sikhi, Ano budaya

Sekhadu na,,

Pemekhittah ngijah ngekhana

Kipak Adat, Najin Budaya

Takhu ko dia..

Gelakh na Kham lain di Khimba

Nukhut, maklum Ijah Negara

Say ngacat, say pingol

Ti tinjuk pak appai luwah Duwakha

Najin ia haga ngekhikhik

Di luppak way, liwat Nyawangan tuha

Tanno,,

Besi Tuha khadu Tahi gakha'an

Besi Ngukha ti pakai di penyabiyan

Kinandi, Bekhattih khik khappuk

khadu gatti Selo'an

Bedil-bedil busendawa, pilukh-pilukh Timah waja

Kham pagun khajjo-khajjo juga

Ulih mak mungkin dia, Ngoloh ko Budaya

Say mudah,Ikah nyadang ko ya

TABIK

Hyogoken, 03 Oktober 2013 

"Dang ni pukhadu"

Hati ku lesoh

Benni kham mawat tungga

Nyak tikham jawoh

Ku sepok mak ku dipa

Bukhambak luwoh, Kapan Niku tabinta

Di tengah bingi

Ku tontong ko di Bulan

Layau lom hati

Niku delom angonan

Induh masani, Kham dapok setungga'an

Puas do, Sayang

Kinjuk ya mingan ku 'di

Tagan Nyak habang

Umpama, Nyak wat keppi

Sejakh bu kukhang, Tikham kita lom hati

Hakhap ku diku Du'a jama Ilahi

Sabakh do nunggu

Tuwon ko dilom hati

Dang ni pukhadu, sampai togok masa ni

TABIK

Hyogoken, 2 Oktober 2013

wayak "LAGI INDUH"

Sedong tikham ku sandang

Beni kita mak tungga

Ngeliyak kenui habang

Angon ku mak kehingga

Nyalai di batang khandu

Habang dunggak  kepunggukh

dipa Ku ingok niku

Disan luwoh ku gugukh

Mati anak bekhuga

Ni sayang, Induk Mayang

Dipa niku tabinta

Disan sungi ku miwang

Mayang moloh mid salai

Anak ni khadu nunggu

Induh kapan, Nyak kelai

Pujawoh anjak Niku

Salai ni Ganta cadang

Anak tetawai hambokh

Ngelamun Nyak di gakhang

Miwang Nyak, Ilung dapokh

Si Kenui kasakh tuha

Kepunggukh khadu khubuh

Puput moneh cekhita

Tungga kham lagi induh

TABIK

Hyogoken,14 sept 2013