Segata: MAK GANTA KAPAN LAGI

Tabikpun ngalimpukha.

Jama kuti puakhi.

Ajo haga nyuakha.

Nyappai ko isi hati..

Budaya lampung kaya.

Melamon di khicci-ni.

Wayak, pattun segata.

Sekiman, adi-adi..

Najin kipak ya khiya.

Dangkung kham waya hati.

Mak setemon tijaga.

Ninggok lebon jak bumi..

Cawa ahli budaya.

Tibaca dija dudi.

Budaya kham ji ganta.

Penyawa ni mak lagi..

Budaya ni keduwa.

Kukhuk jak kanan-kikhi.

Lain angkah cekhita.

Ulih lamon bukti-ni..

Dang moneh putus asa.

Kipak khanno nyata-ni.

Lagi dapok ti gaga.

Asal kham ngemulai-ni..

Lapah kham indai kanca.

Jejama ngangon kon ni.

Kilain kham ji, sapa..?

Mak ganta, kapan lagi..?

Jama tiyan say tuha.

Punyimbang, dalih ahli.

Belajakh khik butanya.

Lapah kham ngemuaq ni..

Lebon ko cela wada.

Budaya lamon khinci.

Ngebebalak ko suya.

Khadu mak zaman lagi..

Lampung kaya budaya.

Mak gegoh dija dudi.

Say penting kham nyemuka.

Dang lamon pusenggikhi..

Kuwa lagi mengukha.

Lagi calaq khik bani.

Sani guwai say nyata.

Mid dipayya ilung ni..

Semapu di budaya.

Lapah kham pelajakhi.

Mak paham kham segata.

Lapah, belajakh takhi..

Piccak khakot, bedana.

Sekura moneh ngasi.

Mak pandai di unyinna.

Cawa lampung, goh ami..

Jejama kham bu du'a.

Kalau tulus menjadi.

Budaya kham melana.

Togok di umpu nanti..

Dang sappai jadi haba.

Budaya kham mak lagi.

Ikah guwai cekhita.

Pengattak buhanipi..

Khadu pay antak ija.

Cawa isi ni hati.

Tabikpun sikindua.

Jama kutti sunyinni..

Tabikpuun,..

Bekasi, 10 jan 2012

Hendri Semaka

Segata: CAWA NGISI

Lain ulih kah sikop
Helau penakai laku
Kahud ku pitu takkop
Khadu tunyin mid niku

Pudak mu helau sikop
Tingkah laku mu betik
Mula gekhing ku tokkop
Mak nikhah kipak cutik

Ibakhat ni pengkhinggom
Kinjuk di kebun kupi
Dandan lagak mu tanggom
Payak nyepok cela ni

Keni pay nyak bu indom
Timbal mak api api
Haku lupa ki pedom
Bang pagun kuhanipi

Dang asa khani tekhang
Labung khatong mak nangguh
Binasa tilah nyikhang
Ki Nyak mak mingan labuh

Bayang nyani gumakhang
Di pukul telu subuh
Ampai moneh ku sikhang
Gekhing ku laju nambuh

Ulih debingi kelom
Siakh kakunang panjak
Sangun bawak ku halom
Kidang hatiku handak

Ngelamun Nyak selinggom
Kapan kidah kham temu
Niku ku ukhau inggom
Kak masa payu hamu

Lain angkah sang tukhap
Demon ku jama niku
Bu du'a khik bu hakhap
Mingan jadi maju ku

Anjung buhatok sikhap
Bekhanda papah khesi
Makin nyak kilu mahap
Ulih cawa ku ngisi.

Tabikpun,..

Bekasi, 14 Februari 2019

Hendri semaka

Hendri Semaka, Seniman Muda Pencipta Segata Lampung | MEDIA SEMBILAN.CO.ID

Hendri Semaka, Seniman Muda Pencipta Segata Lampung | MEDIA SEMBILAN.CO.ID: Tanggamus - Lampung-Hendri atau Hendri Semaka pria kelahiran 11 februari 1976 di Banjar Manis ini ternyata sudah banyak menorehkan karya...

Hendri Semaka Lahirkan Banyak Wayak Lampung

Hendri Semaka Lahirkan Banyak Wayak Lampung

Wakhahan: BALANG BISA

Alkisah,..
Asuk lom pullan tuha,Wat Bebay tuha khik Anak lunik na. Khadu 3 tahun tian khuwa hukhik ngukhusko dakhak tenggalan. Bakas ni khadu mak lagi. katti anak lunik ni appai tipung posokh..
Kasakh tahun, Kasakh cutik dakhak say ni guwai. Nandako Ina ni mak lagi kuwawa kekhajja injuk goh say khadu.

Setahun say liwat, Bala ni tanoman dakha lamon na. Babuy khik kekha ngalahko seunyinna tanoman isi ni dakhak.

Tanno togok masani Paceklik bani. Pepikha kelabaian babuy khik Kekha moloh ngebella ko pakhi say khadu mulay ngisi. Isi ni dakhak say bekhak ni ikah kekikha lima jippang, bella mak nikhah. Bella unyinni tanoman sangtukhap. Mak lagi moneh Hayum, Leppang pekhanti ni tian khuwa mianak bugulai..

Bella...
Say nikhah hiwang manjang. Mak ngedok say nimbal najin ngedudu. Mak ngeduk khang busadu..
Debingi khatong nyani angon lesoh. Nenggakhah tian khuwa pulalimban di Bakha. Ingok jama Bakas ni say khadu mak lagi anjak telu tahun say liwat.
Luwoh mehili ke hisok mak tikhasa. Ni pusau ubun-ubun ni Anak ni..

"..Sabakh Anak ku,.. Ina pandai niku betoh.. Khadu khuwa bingi jo kah kukhuk luwoh,.."

Siyakh ni bakha telikut legoh,.. Mak ngekhanyaman khadu hayu. Tian khuwa minjak di guyang mata bayoh khik tennai kaliwat bettoh. Lagi hayu tian khuwa lapah mid juyu.
Ina ni ngusung tugal say hujung  ni khadu kudul khik sang bekom Bibit pakhi tikhah.
Nugal togok matakhani khalis di Ubun-ubun..

"..Ina,.. Nyak kebetohan.." Hani anak ni.
"..Sabakh anak kahud ku,.. Ajo pakhi appai kukhuk tugalan.."
"..Nyindang kekhasa betoh mu, lapah Kham nyepok balang. suwa mu mengan kanah,.."
"..Lapah Ina,.."
Timbal Anak ni say Ampai tetawai cawa..

Senemon tian khuwa ninjuk Balang. Mawat ki Anak ni massa, kidang sedong juga ngelalina ko bettoh. Ina ni angkah mansa pepikha balang moneh.

Bella moneh bukhani-khani, Buminggu, togok Bubulan tian hukhik jak Balang bisa temanggang..

"..Ina,..Ina.. Nyak khadu leju nganik Balang bisa. Nyak tekhok mengan suwa Balang bisa khik uyah.."  Cawa Anak ni.
"..Sabakh yo Anak ku sayang Ano pakhi Kham Ampai sondom. Mak benni lagi Kham negettas.."

Bulan bubilang telikut. Mak tikhasa Pakhi khadu mulai kuning. Najin wat lamon say cungak jak say sondom. wat lamon say hapa say jak say ngisi..

Khani khadu mulai panas..
Anak ni khadu ngebekom pepikha balang bisa di culuk ni. Iya nunggu injuk ayuk ni, Ina nyesuk balang bisa pakai lihai. Ni panggang, sekhadu jak ni gimali uyah buku..

Pakhi tellu ngebekom khadu ni tutu..
Anak ni khadu lemoh, Bubulan mak nungga emmi.
Badan ni ngekhayangan. Najin umukh bulapok, lapah ni bunjak legoh jak say khadu.
Mejong Anak ni senggayakh di lesung. Ngebekom Balang bisa say pepikha khadu mati, nunggu Ina ni lasuhan. Mak budaya,..!! anak ni nyelekhan di Ina ni say sebenokh ni khadu lemoh moneh.
Angkah hati ni say lagi kuwat. Khepa cakha ni luwah jak masa paceklik bani..

..Ina, Ina,..
"..Balang bisa ku Ina.."
".. Mesak dihati tangan.."
"..Wat Emmi kodo Ina.."
".. Nyak betoh haga mengan.."
Hani Anak ni bubisok megung tenai..

"..Sabakh Anak ku,.. Ajo lasuhan appai khadu, Sekhabbok lagi Kham nyonjong.."
Anak ni tekanyap, pedom. Mak benni gumakhang diguyang betoh..
..Ina, Ina,..
"..Balang bisa ku Ina.."
".. Mesak dihati tangan.."
"..Wat Emmi kodo Ina.."
".. Nyak betoh haga mengan.."

Nimbal Ina ni dalih bubisok.
"..Sabakh Anak ku,.. Ajo Uway ni appai haga mekhunggak. Tahan yo Anak ku.."
Mak ngedok suwakha, Kah suwakha Emmi mekhuggak di Khayoh.
Anak ni tepedom, megung tenai say nikhasa kasakh sakik.
Ni pusau Ubun-ubun ni anak ni sambil ngunjukh ko apuy.

Mak mesaka Anak ni Gumakhang..
..Ina, Ina,..
"..Balang bisa ku Ina.."
".. Mesak dihati tangan.."
"..Wat Emmi kodo Ina.."
".. Nyak betoh haga mengan.."
"..Sabakh Anak kahud ku,.. Ajo Emmi so khadu mesak. Mak mesaka lagi Kham mengan. Sabakh yo Anak ku.."

Hana Emak ni ngelunik ko apuy..

Anak ni tepedom..
Balang bisa khadu gulik mati lom bekoman culuk. Ikah khuwa say nikhah, khadu ni panggang Ina ni.

Ina ni ngakuk Ondom pekhanti tian mengan.
Ni suwik Emmi anjak khayoh, say halok khasa ni pagun nyattok.
..Ina, Ina,..
"..Balang bisa ku Ina.."
".. Mesak dihati tangan.."
"..Wat Emmi kodo Ina.."
".. Nyak betoh haga mengan.."
".. Ajo Nak, Emmi so khadu mesak. Balang mu lagi mehandop.."

Ni sebu Emmi sang pujuk. Ni taban anak ni.. bu ikhing hiwang..
..Ina, Ina,..
"..Balang bisa ku Ina.."
".. Mesak dihati tangan.."
"..Wat Emmi kodo Ina.."
".. Nyak betoh haga...!!??.."
Suwakha Anak ni putuk. Emak ni kasakh bunjak miwang,..

"..Jo Anak,.. Niku ku posok, mengan.." 

Anak ni ngehaman,.. Banguk  ni mangah mak cawa lagi..

"..Anak ku sayang,.."
 "..minjak Kahud,.. Jo Emmi so khadu handop.."
".. Ija niku ku posok.."
"..Minjak Kahud,.. Jo Balang bisa so khadu mesak.."
"..Ija niku ku posok.."
Ni guyang badan ni pelegohan. Mak lagi minjak..

Tekacai Ondom jak culuk. ngisi Emmi handop. Kidang badan Anak ni khadu ngingi..

"..Ya Allah,.. Anak ku.."
"..Ajo Balang bisa mu khadu ku utin cutik.."
"..Ya Allah,.. Anak ku.."
"..Ajo Emmi handop mu khadu ku pujuk.."
"..Minjak anak, ija niku ku posok,.."
"..Minjak Anak, Dang Ina ni Henna"i.."
"..Kihaga bacak-bacak,.. Bacak Ina say mati.."
Anak ni mak lagi gikhok. Badan ni Kasakh ngingi..

Ina ni pagun ngepapusau Ubun-ubun ni Anak ni.

"..Balang bisa mu Anak,.."
"..Mesak di hati tangan.."
"..Minjak luwot pay Anak.."
"..Lapah lagi Kham mengan.."

Mangi sangtukhap..
Emak  ni khadu lemoh,.. 
Hiwang ni mak lagi kedengi. Lelegohan ngedakok anak ni..
Ni pusau Ubun-ubun ni. Badan ni kasakh mak budaya..
Angkah mata ni say gikhok, Nyilikhan di balang bisa khik Emmi say tabukh di tanoh.

Mak mesaka Badan tuha Ina ni moneh ngingi. Tian khuwa mak lagi..



"Puput.."



TABIKPUN,..

Bekasi, 09 Februari 2019
HENDRI SEMAKA

Binasa Selat Sunda - Hendri Semaka - terjemahan

https://www.youtube.com/watch?v=l872OxxUmYc&t=400s

Penasaran apa itu SEGATA..??

Divedo ini dijelaskan Arti dari segata sekaligus arti Syair dalam Bahasa Indonesia

yang telah di Terjemahan dengan apik Oleh Adinda NOVELLIA YULISTIN.
Yuk check disini:

https://www.youtube.com/watch?v=l872OxxUmYc&t=400s

Penasaran arti lagu yang lain? 

Yuk simak videonya di: 

http://www.youtube.com/c/CAWOEKAMNOVELSANGGEM

Segata: NYEDONG

Hukhik kham di dunia
Sangun lamon guda ni
Guway salah khik dusa
Bulapok unggal khani

Dang dia kimak ngattan
Hacak kecah hati ku
Maklum guda ni sitan
Tipu daya semapu

Ngaku Kham paling nalom
Nengah mak haga nyimbin
Laju mak haga sondom
Keduwa gunjukh unyin

Nganggop say bakhih bugu
Say pittokh Nyak tenggalan
Sukkan kok haga nagu
Pak layang setinggulan

Ti liyak kikhi kanan
Hulun gulik mak ngedok
Tapos kham lelajuan
Pungah moneh mak tittok

Senggitah na kuwawa
Segala ni kham uwat
Nebekang culuk khuwa
Jahal hati keliwat

Say paling balaq kah Nyak
Kaban puwakhi lunik
Sipat nyani Kham cungak
Dusa pak balaq henik

Ingok bunyi sekiman
Ijah kantu Kham lupa
Kekala say ngehaman
Ya ngisi lain hapa

Mak liyu hukhik nyedong
Ngaku Kham paling dibbah
Tubang liyom kham dondong
Tukhun Kham mak ke agah

Sesol khatong ni dukhi
Andan tikkah khik banguk
Kantu khamah puwakhi
Ngebib tukhun Kham linguk

Lapah Kham aji dikhi
Kantu tehantuk tegah
Mak bunjak Hulun sikhi
Ki santokh kejung galah

Tabikpun..

Bekasi, 06 Februari 2019

Hendri semaka

YOUTUBE CHANNEL
Segata Lampung say nyekhita ko Musibah TSUNAMI SELAT SUNDA 

(Tsunami Lampung khik Banten) 

Syair: Anjak Segata dilom Blog Kham say judul ni gegoh: "BINASA SELAT SUNDA"

Tekhimakasih jama: 

Puwakhi Yhonda Rizal, Yogi Wardana, Yunasri CEO anjak TPND KAHUD production, Khik mak lupa jama seunyinna minak muakhi say wat kehangguman di adat budaya Kham Lampung Segata khik wayak.


https://www.youtube.com/channel/UCoraC8KvXQLVqFbwxrT0pRg

  KUNJUNGI JUGA KE CHANNEL YOUTUBE KAMI
  "SANAK PEKON GENERATION"
https://www.youtube.com/results?search_query=hendri+semaka

Hahiwang: "BALANG BISA"

Alkisah ajo kidah
Cekhita zaman jebi
Kajong khik tamong nyukhah
Petika tengah bingi

Sukhah ni Balang Bisa
Cekhita sang mianak
Tinggal Anak khik Ina
Khadu Mak lagi Bapak

Say tinggal angkah Ina
Jama Anak lunik ni
Lagi di zaman sina
Dunia lagi mangi

Takhu di pullan tuha
Ya nanom pakhi dakhak
Wat hati Mak bujiwa
Malang nihan tinekhak

Nasip ni tiyan khuwa
Nunggal mak ngedok kantik
Ina kasakh metuha
Dakhak ni kasakh cutik

Bekhak ni mak sepikha
Ulih mawat daya ni
Bala Babui khik Kekha
Tengan paceklik bani

Pakhi bella mak nikhah
Kani'an Balang bisa
Hukhik keliwat susah
Badan laju binasa

Nanom pakhi do ina
Makai penugal patoh
Bupantun Balang bisa
Anak ni khadu betoh

Balang bisa ku Ina..
Mesak di hati tangan..
Wat emi kodo ina..
Nyak betoh haga mengan..

Mak Benni pakhi balaq
Nijaga unggal masa
Anak ngakuk bekhalaq
Ya pantun Balang bisa

Khadu benni penahan
Pakhi ni mulai ngisi
Anak ni kebetohan
Balang bisa ti aji

Balang bisa ku Ina..
Mesak di hati tangan..
Wat emi kodo ina..
Nyak betoh haga mengan..

Senggayakh ya di helu
Khadu mak ngedok daya
Sakik tenai mid hulu
Haga cabuk ni maya

Pakhi ni khadu kuning
Anak ni tinggal magoh
Najin lom hati gekhing
Bupantun kasakh lemoh

Balang bisa ku Ina..
Mesak di hati tangan..
Wat emi kodo ina..
Nyak betoh haga mengan..

Mak mesaka ya khatong
Masa ni penggetasan
Khadu lemoh kok nontong
Dunia kelom pinsan

Bias khadu mekecah
Anak mawat budaya
Pantun anak ni kidah
Balang bisa nyemuka

Balang bisa ku Ina..
Mesak di hati tangan..
Wat emi kodo ina..
Nyak betoh haga mengan..

Khayoh khadu mekhunggak
Mak benni Emmi langok
Anak khadu te anyak
Kah mingan ngumbau hasok

Di culuk kikhi Ondom
Nyakhuk Emi jak khayoh
Anak ni khadu pedom
Ina bumandi luwoh

Balang bisa mu Anak..
Mesak di hati tangan..
Jo Emi khadu mesak..
Lapah lagi Kham mengan..

Ni guyang mawat minjak

Tekacai moneh Emi
Ina nutuk te-anyak
Maya ni mawat lagi

Najin semapu ulah
Betoh ni mak kehingga
Ina ni mati tegah
Penyawa mak kegaga

Manjau Pusekhanggitan

Bupedatong di hiwang
Ngeni pandai lom pullan
Isi khadu meluwang

Mak benni apuy padom

Dunia hiyon tengi
Balang bisa lom bekom
Di Tuhan ya busaksi

Khanno da Cutik kisah

Wakhahan lagi lunik
Dipa sukukh kham kidah
Wat juga penganik

Sebut Alhamdulillah

Di Tuhan dang sebinjik
Mak ganta kapan kidah
Kakuwa lagi hukhik

Balang bisa ku Ina..
Mesak di hati tangan..
Wakhah kalau beguna..
Kenyin jadi pegungan..

Balang bisa ku Ina..
Mesak dihati tangan..
Hahiwang Balang Bisa..
Togok di pemuputan..

Tabik puun,..

Bekasi, 01 Februari 2019

HENDRI SEMAKA