segata: "IJAH TAWWAI"

Ku tanom pay do pakhi

Nyabuk jak pembunian

Tanda kita muakhi

Se-ijah, setawwayan

Se-ijah setawwayan

Sepenyinan di cawa

Tetepay hulun kaban

Ki menok kham celaka

Hamu awi di pekhing

Say kawokh hamu salah

Ngebattah luwah takhing

Sekiccong uyak galah

Sekiccong uyak galah

Ngaku benokh tenggalan

Mula puwakhi ngijah

Kantu jadi sesolan

Balaq batang Belimbing

Ninggam penggekh khenglaya

Hokhek dang kedol cuping

Kantu mak temon dia

Kantu mak temon dia

Mingan hukhik tenggalan

Pagun ulang lajuna

Khituk puwakhi kaban

Pakkalan di pinggikh way

Paccukhan batang biyah

Say tuha wajib nawway

Ki wat say ngukha salah

Ki wat say ngukha salah

Say Tuha, mak ngekhana

Bangik ga hulun nyukhah

Mati puas si Da'a

TABIK.

Hyogoken, 01 Oktober 2013 

"KAGAK NYANGKA"

Hari Jum'at depan apotek

Liat cewe' paras nye cantik

Kulit mulus gak pake burik

Idung mancung bukan nye plastik

Body bohay gitar Accoustic

Bibir mere gak pake lipstik

Mate ane langsung melirik

Abis si Do'i emang menarik

Biar tampang Ane pas-pasan

Kata orang kayak kukusan

Kalo udah liat perawan

Ane ngerasa Vino bastian

Apelagi ni kesempatan

Do'i lagi jalan sendirian

PD ane di level Lapan

Ane samperin, ngajak kenalan

Basa basi di permula'an

Ibarat minum sebelum makan

Abis ntu kasih tembakan

Biar Do'i terbang ke awan

Emang dasar ni hari baik

Di terime ame si cantik

Puas ngobrol depan apotek

Nganter pulang pake si matic

Nyampe rume nye, tambah asik

Ngopi ame makan keripik

Muter dangdut lagu A.rafiq

Obrolan kite tambe menarik

Die kagak demen Diskotik

Kate Do'i bikin berisik

Doyan kredok gak suka Bistik

Seneng kebaya bahan nye batik

Kite masih di teras depan

Enyak babe di Ruang makan

Enggak lame, eh,, turun ujan

Suasane makin berkesan

Ujan reda, Ane pamitan

Malam minggu kite janjian

Nonton Bioskop e Bedua'an

Bang Benyamin film nye Tarsan

TABEK,,

Hyogoken 07 Oktober 2013 

"TERMINAL RAJABASA" (segata putawok)

*1. SEGATA BEBAY

Togok moneh masani

Abang moloh usaha

Moloh mid jawa dudi

Ninggal ko sikam dija

Terminal Rajabasa

Dija jengan kham pisah

Luh gogokh mak ku khasa

Ngiling ko abang lapah

Mulang pepinsan kala

Ngebatok tikham hati

Handak hati ku khila

Kham tungga lom hanipi

Lapah mu mid khantawan

Ngebedak pulau jawa

Nyin hakhungan kesiwwan

Citta kilu Kham khua

Du'a ku diku abang

Kalau munyai mekhawan

Di Nyak niku dang bimbang

Ku penah lelegohan

Anak say di tinggal kon

Sina penguwat Iman

Tagan sikam di pekon

Dang jadi kewatikhan

Mubil bis Bakau Heni

Ngebatok Abang lapah

Najin kham pisah benni

Sabakh Nyak dilom penah

*2. SEGATA BAKAS

Anak kajjong ku sayang

Mahap ko pay Nyak lawi

Nyak lapah moloh midang

Mid pulau Jawa dudi

Badan ku di sebekhang

Kahud ku tinggal dija

Pujama kita senang

Kidang mak ulah dia

Terminal Raja basa

Tagan jadi saksi ni

Mati ni bulup dusa

Ki nyak mak moloh lagi

Anak kahud kham sayang

Andan ko betik-betik

Kehukhi'an Kham malang

Sakik Kham lain cutik

Abang lapah Usaha

Tulung Ikhlas ko kuti

Kalau mak kheji juga

Nasip mingan buganti

Mubil bis Bakau Heni

Pelegohan ya lapah

Najin Nyak lapah benni

Lom hati mak ki khubah.

TABIK..

Hyogoken, 16 Oktober 2013

segata: "PENGANGGURAN"

Ajo dia ku hija

Sakik na di khantawan

Niat nyepok kekheja

Bagian mangkung khawan

Ninggal ko Hulun tuha

Puakhi khek Indayan

Ngebedak pulau Jawa

Ninggal ko pemekonan

Minjak mehayu juga

Dang sappai kemawasan

Lapah nyippok kekhajja

Luwah kukhuk kawasan

Lapah netai khenglaya

Kelabung kepanasan

Badan keliwat buya

Butudung kekhtas koran

Unggal Jamma ti tanya

Khayya perusaha'an

Ulih kekalau dia

Kantu khejeki disan

Tungga indayan saka

Hana Uwat lowongan

Lapah Kita mid di ya

Kidang sumang Kawasan

Lebon khasa ni buya

Ni kanik kehangguman

Laju do Sikam khuwa

Lapah mak pelegohan

Injuk mawat kekhasa

Togok moneh tujuan

Kawai handak hehana

Basoh, Ulih hitingan

Tulisan balaq nana

Nandok di Gerbang depan

Ikah cutik bunyina

Hani Ada Lowongan

Kubaca moloh Du'a

Ku luwah ko Lamaran

Lapah do sikam khuwa

Mid Kantor keamanan

Luwah Satpam Kepala

Tuppak nanya Tamatan

Wat kodo say Sarjana

Ki uwat, kebenokhan

Laju ni Nyak ngehamma

Sumang anjak Indayan

Hani ya, Nyak Sarjana

Palas Nyuduk Lamaran

Lassung Nyak nangguh menna

Ngebatok nasip badan

Moloh injuk pekhtama

Lapah cukut tenggalan

Mawat ti khasa-khasa

Bella moneh kebiyan

Haga ngehapat Isya

Nyak mulang mid Kontrakan

Singgah di Warung Jawa

Gekhilan ilung kanan

Mengan gulai pekhiya

Sambol, dalih Gorengan

Lepas Sembahyang Isya

Ngelamun pepedoman

Api bang Sakik nana

Nasip khik Tenemuan

Minggu bella mak cawa

Bella moneh Bubulan

Nyak pagun khayya juga

Nasip ni pengangguran

Basoh di tuku mata

Miwang mak ngekhanyaman

Hulun Tuha tabinta

Mati luwak bagiyan,,

TABIK

Hyogoken, 17 Oktober 2013

"SENGGITAH"

Senggitah ni senggitah

Segata khani hinji

Awas nyani kham pungah

Ano penyakik hati

Khadu lupa say di bah

Ki khadu datas dudi

Kok lapah kejung galah

Jappal mak napak bumi

Senggitah ni kham nalom

Sunyin ni pandai dia

Say bugu ti puliyom

Ni lalangi ya juga

Say ngedok pudak sikop

Badan handak mekhanggal

Indayan mak ni anggop

Ti tagu mawat nimbal

Senggitah lamban helau

Mak nyikhang tukhuh hatok

Unggal puwakhi manjau

Sukkan ngebukak khangok

Wat moneh say bu pakkat

Kekhja di pemekhittah

Mak ngalah ki mupakat

Cawa mak haga di bah

Senggitah hukhik bangik

Cukup segala-gala

Tapos jama say sakik

Say hina dalih papa

Senggitah ni senggitah

lapah jejama hija

Dang tapos dalih pungah

Hukhik mak bangik juga

Senggitah ni senggitah

Penyakik dilom dada

Hani say tuha nyukhah

Hukhik jo motokh juga

Sengitah ni senggitah

Lapah kham jawohi ya

Jejama kham bukhubah

Kantu mingan ti gaga

Senggitah ni senggitah

Nyani kham balaq hulu

Ketubbang Tuhan makhah

Di sapa kham busadu.

TABIK

Hyogoken, 25 Oktober 2013

"TUWON"

(NUJU: SAY HAGA BULAMBAN)

Cakak Jung kelabungan

Kengisonan kham khuwa

Lain say kecadangan

Ki niku ngepekhuwa

Singgah pulau Tabuwan

Tandang bulung memata

Nyak khawan niku khawan

Kham mingan tungga ganta

Jukung mak bu sekapan

Balaq ni mak sepikha

Niku ngeni hakhapan

Ngajak bu khumah tangga

Sai biduk sai kayuhan

Tujuan sai dekhmaga

Busukukh jama Tuhan

Togok niat khencaka

Nyak ibakhat kayuhan

Niku jukung umpama

Sai hati sai lapahan

Niat hukhik jejama

Setawit sepegungan

Bulat ko di khencaka

Kalau mawat halangan

Mejong di kutamakha

Bujanji setuwonan

Khanno pakat kham khuwa

Togok di penayuhan

Sepegungan di cawa 

TABIK

Hyogoken, 02 November 2013.

"LAMPUNG"

Sapa mak pandai Lampung

Provinsi Kaya raya

Adat budaya Agung

Di Hulu ni Sumatera

Asal Tuyuk gekhinung

Jak pesagi di Liwa

Sigokh lambang ni Lampung

Jukhai ni uwat khuwa

Dija wat batik kappung

Pincak khakot, Sekura

Gung khik Tala kekhumung

Takhi Sembah, Bedana

Tapis sulam ni Lampung

Badik, kekhis bessi na

Nyo, Api basa Lappung

Makai sukhat Kaganga

Lamban ni khupa Panggung

Mahan sesat, gelakh na

Lagu ni Jamma Lampung

Saburai helau nana

Huma tanoh khik Gunung 

Gumbu ni mak kehingga

Lada Cakkih ni ngagung

Kejuju ni kehuwa

Gumah Lawok mak nanggung

Bukhibu bilang Iwa

Bukhatus isi Gunung

Isi pullan khik khimba

Wisata mak kehitung

semapu di khinci na

Way lala'an, Pihabung

Pasir putih, Marina

Gunung Krakatau Lampung

Way kambas, Tanjung setia

Teluk kiluan Lampung

Danau Ranau, Tekhbaya

Budaya kham say Agung

Tanggung jawab jejama

Basa kham kasakh lijung

Ki kham mawat ngandan ya

Kupi mak lagi ngagung

Ki mak nemon ngulah ya

Jak Bali mak ki nulung

Ki Budaya mak lana

Lapah jejama pegung

Jejama ngekhekhaba

Kenyin langgakh goh gunung

Mak lebon jadi haba

Keliyang kinjuk bulung

Khadu mak ngedok guna

Kukhuk niyu mak ukhung

Peyuyyuhan uccuk na

TABIK

Hyogoken, 30 Oktober 2013

segata: "PEKON"

Kupapenyin ko inday

Dilom pekon kham ganta

Wat khubah mak ku khassai

Khadu injuk di Kota

Mawat lagi ti pakai

Cakha Lappung dinana

Ilung Dakhak ilung Way

Setaguan ki tungga

Adat khadu ti kacai

Mak pandang Tuha ngukha

Kok nagu, Nyak mekhabai

Pemenok ni, mak waya

Ngelagok dilom angon

Api mula bang khiya

Tuppah ni khupa pekon

Kidang sumang di Cakha

Nagu, khadu mak demon

Sekhakhanggal di kuta

Babikh mak lagi lamon

Lain goh zaman saka

Khadu bu kukhang akkon

Hukhik sedunna-dunna

Puwakhi danggop holon

Cawa ni sembakhana

Lamon say hati jahat

Kekhukunan mak lagi

Kelalah, injuk Jimat

Najin wat, halok nyuwi

Masalah mak ki bekhat

Khigu inday khik kunsi

Mak ki haga mupakat

tuppak ngadu pelisi

Kinandi nukhut hadat

Anjak zaman saka ji

Bettik-bettik di pakat

Mandang, di kanan kikhi

Lain ki ketenganan

Pekon Kham injuk Kota

Maju ni Pembangunan

Khadu saka ti Citta

Api ki mawat mingan

Akuk Helau ni khiya

Cakha ni Pemekonan

Najin Khupa ni Kota

Tungga Kham setaguan

Ti khegga'i, say Tuha

Adat khik Petutukhan

Ti pakai indang lupa

Ajo ikah sekiman

Lain wat khetti wada

Mahap ki kebenokhan

Telibak pekon kita

TABIKPUUUN,,

Hyogoken, 5 November 2013