Puisi untuk Buku ASBL (Antopologi Sajak Bahasa Lampung)

"NYOMOKH"

 Goh bakha, di awang-awang..

Di khatusan bittang, Niku bu inday.

Ku cigau Niku mak mingan.

Tangih haga ku akuk,

Kok cungak, Nyak mesikhi..

Kidang,..

Khadu sukukh ku lawi

Kena siakh mu, najin mak benni

Katti ni salok awan debingi. 

(Hyogoken-Jepang, 13.Januari.2013).

"TANOH KHAM"

Ajo tanoh Lampung.

Bukuta mammang khik du'a.

Tanoh tenglangikh ni malaikat..

Ajo tanoh butuwah.

Lain tanoh butulah..

Ajo tanoh gumbu.

Lain tengilu astawa tenghalu..

Ajo tanoh kekhamat.

Api say mawat..?

Ditanoh jo tanno.

Mak lagi ngedok 'sikam'.

Ditanoh jo tanno.

'kutti' mak lagi.

Ditanoh jo tanno,

say uwat ikah 'kham..'

Lapah jejama..

Dang ngesai kibabah, kidang hati mak titatah.

Ngesai ki cawa, kidang khua di kahaga.

Jak unggak, jak doh, kikhi khik kanan..

Hinnolah kham.

Bida warna, semapu khupa,,

Hinnolah kita.

Mak mingan kodo..?

Kham mengan senga pelambakhan.

Sangakebun kham budakhak.

Sang kelasa kham buguwai..

Khadu'i pay, nebekang culuk.

Puhahejak, putunjuk-tunjuk.

Ngapulaju, pudaku-daku..

Ditanoh jo tanno, mak ngedok lagi 'sikam'.

Ditanoh jo tanno, 'kutti' juga mak lagi.

Ditanoh jo tanno, say uwat adalah 'kham..'

Tanoh Lampung, tanoh kham..!

(Bekasi-Indonesia, 27 febr 2012)

"PUSANG"

Bulung.

Khadu mak ngedok tiyak ni imbun.

Kinandi imbun pakai kham nginum.

Tunas.

Khadu mesaka jadi kepunggukh.

Padahal jak tunas kham mingan mujuk.

Pucuk.

Khadu benni jadi keliang.

Najin pucuk, suwa kham mengan.

Hihhuk bukhubah jadi hasok.

Tanoh mak bu-Litak.

Kekhing.

Segaga haguk sikhing..

Kham juga gegoh,.

Seha-henna bujegol.

Pusang..!

(Bekasi- Indonesia, 25 febr 2012)

"TEKABOK"

 Temon Nyak mak tanggom takhu dija

Di kelasa handop, butabukh kemunyangan.

Lain buwayak, sesimbatan..

Ngeliyak muli bu 'span kepellik'an.

Lain buhinjang Tapis, kumbut sulaman..

Kidang,,

Ajo dia kemajuan.

Mak lagi ngedok penulung kham.

Mana Kham, jejama tekabok..!!

Hyogoken - JEPANG, 27. Januari 2013.

"SINJA"

 Matakhani senggayakh di gunung

Butikhai khekhunih debi

Langik mak ngedok tepang

Angin manjau bupedatong iyos.

Sinja...

Mekhawan niku khatong geluk.

Hayu kakhu Nyak kelabungan.

Busukukh niku togok

Teggi kakhu nyak kepanasan.

Hyogoken-JAPAN, 11. Januari 2013.

"ANAK MAYANG"

 Putungga niku payah putagu

Bida di wangga sumang di cakha

Kulih ulih di dasokh hati

NI timbal jakhi kikhi

Ali-ali di anak mayang

mak buhung lagi.

Hyogoken-Jepang, 21. januari. 2013

"BELLA"

 Khadu bella hili ni kahud ku

Dinana tunyin mid niku

Semakkung langok, ni siakh tegi

Cakkok, ni kekhing ko gekhing say bakhih.

Kak khadu nyak malih

ngeson ko tiyak-tiyak pengahud.

Kidang lain jak niku lagi.

Hyogoken-JEPANG, 01. Januari. 2013