Wayak: ''TENEMUAN''

Semapu punyandangan.
Hukhik dillom dunia.
Melamon kehagaan.
'Wat hati mak bujiwa..!'

Tetangga dihadapan.
Lamban ni loteng khua.
Bekhak ni pemalapan.
Khappa lapangan bola..

Lamon bu-gegaduhan.
Kebau segala khupa.
Mubil terrano nissan.
Motorni ngakhakhua..

Mak jaoh dihak kudan.
Kebun kupi khik lada.
Sabah mak keculu'an.
Sakking lamon bilangna..

Bakas di kejaksaan.
Babbay gukhu sekula.
Warung dihadap kanan.
Bujangan ngalalima..

Luggak ni tenemuan.
Mak goggoh dikedua.
Simakna mubil nissan.
Kham makai khuda khua..

Akik hinno kreditan.
DP-ni khua juta.
Lima khatus sebulan.
Tellu tahun bennina..

Kham takhu dikontrakan.
Panas ni mak kahingga.
Dapukh busassay papan.
Kak labung, tukhuh juga..

Gaji kuli sebulan.
Sangkhupiah mak nyisa.
Khituk nyippok injaman.
Kak togok tanggal tuha..

Wat niat memidokhan.
Mid di Ancol Jakarta.
Bang cawa ni inggoman;
'susu anak kham bella..'

napayu do inggoman.
Kham dang lejju bu-du'a.
Kekalau kehukhi'an.
Mak goggoh khajjo juga..

Injuk hani sekiman.
'hukhik ibakhat khuda'.
Kekalau kadolokhan.
Kham goggoh dikedua..

Ketubbang kanah mingan.
Kehukhi'an wat juga.
Dang lupa jama Tuhan.
Ingok muak kham saka..

Sayang di say mak khawan.
Yatim khik miskin papa.
Dang lagak goh jukhagan.
Khadu mak liyu dia...?!

Tabikpun..!

Banjakh manis' Gisting, Tanggamus, Lampung mei 2010.