SEGATA: "SELABAKH ANAK MAKHGA"

Pemimpin tanoh lampung.

Jo lehot jak semaka.

Janjimu say kupegung.

Lagi kampanye saka..

Haga majuko lappung.

Nyin goggoh di kadua.

Yamula ni mak ukhung.

Nipilih sanga makhga..

Lain ki-nyak sahitung.

Ngilu balos dijasa.

Pusikam lain 'basung'.

Kantu, 'jagung' ni sia..

Ibakhat aji mumpung.

Niku do penguasa.

Semakkung niku lijung.

Di gattiko kadua..

Tabuh kiccong ko 'gung.

Sani guwai say nyata.

Najin wat guttukh-labung.

Dang mandok di khanglaya..

Dang khappa injuk bukhung.

Kah hatang disuakha.

Janji saka tipegung.

'tulung, iwakko makhga..'

Ngabahko kaban bekhak.

Dikota dipumatang.

Khelaya gulik kikhak.

Gunung lamon say cadang..

Liyak suku say bakhih.

Jaya di khang tenggalan.

Ya ulah khappa ulih.

Hani bunyi sekiman.

Liyak negekhi batak.

Astawa di palembang.

Khadu mesaka cakak.

Kebunyi togok sebekhang..

Geluk-gelukko minjak.

Dang kah nunggu gumakhang.

Najin mak paling unggak.

Penellu goh, kham senang..

Dang benni ga tapeddom.

Lamonko ngaca dikhi.

Santokh conggok khik sondom.

Khappa haga lajuni..

Hayutta lapah kidah.

Sikam say ngadukungni.

Nyin lappung mingan nengah.

Dang segalana, dukhi..!

Khadu kepelok lapah.

Pemekhittahan kutti.

Mula nyak buginalah.

Nulis isi ni hati..

Cuba liak say dibbah.

Dang santokh di 'kekhussi'.

Anak negekhi susah.

Korupsi nambah njadi..

Pusikam dunggak bangik.

Dang ngeluh makin suwang.

Khegga gulik mid langik.

Khappa sikam mak miwang..

Segala penghakhapan.

Jejama ngangon koni.

Lapah kham setawitan.

Sunyin anak negekhi.

Pemimpin dihak depan.

Say nalom khik mebani.

Mingan jadi tutukan.

Kenyin holon mesikhi.

Say tuha dang pinggikh ga.

Say ngukha lapah nengah.

Ki kham puliyom juga.

Khappa laju kham kanah..

Lain ki nyak mejahal.

Lain mawat busukukh.

Sekula, bubat mahal.

Hulu sulah mak cukukh..

Hakhapku dang-ki makhah.

Dang moneh bolok hati.

Sangun sikam say dibbah.

'oposisi sejati...!!'

Tabikpun...

Gisting, mei 2010.