wayak: 'MUDIK' (mulang pekon)

Pembangunan mak khata. 
Mula malih jak sungi. 
Ngebedak tanoh jawa. 
Di pekon kasakh mangi. 

Nengis kabakh cekhita. 
Tian say mena dudi. 
Usaha di Jakarta. 
Injuk bangik ti dengi.

Yamula lagi saka.
Bulat niat di hati.
Nyuba nutuk usaha.
Duli kipak ya kuli.

Kekhja di pulau jawa.
Khadu tulis ni dikhi.
Jawoh jak hulun tuha.
Jak indai khik puakhi.

Usaha di Jakarta.
Di tangerang, Bekasi.
Di Bogor, purwakarta.
Semapu di jengan ni.

Semapu di usaha.
Bumacom di khambak ni.
Dagang, wirasuwasta.
Wat moneh jadi kuli.

Mak mulang kimak buka.
Setahun kah sekali.
Nyilau tian say tuha.
Mampan ko tikham hati.

Pedatong mak sepikha.
Cukup ongkos goh jadi.
Say penting pujejama.
Kuppul minak muakhi.

Mawat tikhasa-khasa.
Bela moneh waktuni.
Kipak tikham kung bela.
Moloh, ulang lajuni.

Tinggal luwot say tuha.
Kipak biyak di hati.
Ngusung semapu du'a.
Nguccang ko khilau hati.

Dimubil mak kekhasa.
Mata basoh khasani.
Angonan induh dipa.
Kok lalang nyak tengbidi.

Kattu say penting du'a.
Kalau tulus menjadi.
Togok niat khencaka.
Munyaian kham unyinni.

Bela di khappa cakha.
Mak ki ngedok hasil ni.
Mawat ti khasa-khasa.
Bela moneh sekhani.

Usaha api juga.
Asal halal judul ni.
Liyom khik balak suya.
Khadu mak zaman lagi.

Kuwa lagi mengukha.
Menggekhib lagi benni.
Lagi metajom takha.
Hotok calak khik bani.

Tabikpun.
Bekasi, 1 agustus 2012