'WAYAK KIKHAK' (fesbukan)

Jak Tanggamus, Semaka. 
Di kecamatan Gisting. 
Wayak bukhak nyemuka. 
Kisalah, kilu bimbing.. 

Banjakh manis pekon kham. 
Kebuayan Tekhuggak. 
Wayak nuju pusikam. 
Judulni 'wayak kikhak'..

Bekasi jengan ganta.
Di jatimulya Tambun.
Kantu salah di tata.
Sikindua, 'tabikpun'.

Kham khadu sekenalan.
Najin ampai di facebook.
Makkung ki setunggaan.
Maklum, jejama sibuk.

Geddahni kemajuan.
Sukhat mak jaman lagi.
Twitter dalih facebookan.
Sungi kita bubagi..

Nutuk do kham facebookan.
Goh inday kanan kikhi.
Muak ni kham kenalan.
Kalau jadi puakhi..

Melamon do kenalan.
Suntan togok Bupati.
Sejjakh pak setinggulan.
Khanno pekhettok hati..

Status baru disani.
Komentar say titunggu.
Ya tukhun pagi khani.
Angkah mansa kelimpu..

Say nalom di agama.
Bagi hadist khik firman.
Sejjakh nambah pahala.
Guna-ni 'pertemanan'..

Lain moneh kah cutik.
Ngewada pemekhittah.
Ngekhasa kena ilik.
Nulis sendali makhah..

Say dagang juga lamon.
Mubil, motor khik badik.
Induh ano satemon.
Api haga ngebudik..

Sangun watdo bekhita.
Mekhanai nyulik muli.
Najin melamon juga.
Bulambanan andahni..

Wat say nyani cekhita.
Nyela astawa ngopok.
Wat moneh cawa khuta.
Semapu di pekhettok..

Payu do kham pekhwatin.
Muakhi seangkonan.
Pepadun khik saibatin.
Dang sampai secadangan..

Hadat budaya, andan.
Sang bumi khua jukhai.
Kalau dia kesiwwan.
Togok di jimmoh sawai..

Setanya kham dikabakh.
Setaguan pak cutik.
Bubagi dang setakakh.
Sunyin ilmu say bettik..

Najin 'online' mak benni.
Sejjakh kippak sekhabbok.
Wayak, wakhah, tisani.
Nyin Lappung goggoh khoppok..

Kipak jengan pujawoh.
Muakhi se'angkonan.
Kilu kham halok gegoh.
Kalau munyai mekhawan..

Wayak kham mak sepikha.
Khadu pay sengatukhap.
Tabikpun, ngalimpukha.
Tubbang wat tekaliccap..