TKW (sekhatus cabuk pitu)

>Mati luwak bagian.
T.K.W Indonesia..
Lapah nyippok pemengan.
Mid Arab khik Malaysia..

Di negekhi tenggalan.
Payah nyepok kekhajja..
Najin tian pandai sallan.
Pagun tian lapah juga..

Ulih dija mak mingan.
Hukhik gegoh kedua..
Yamula kakak-minan.
Lapah hingga kuwawa..

Bayakhan lain cutik.
Gadai kebun khik sabah.
Ngeliak anak khamik.
Yamula buginalah..

Lapah mawat ki ukhung.
Kipak mak makai visa.
Say di Arab, ni pancung.
Di Malaysia, disiksa..

Massa jukhagan jahat.
Badan khik hati sakik.
Kekhja payah melakhat.
Anak bakas ni cukik..

Hinggo wat kesalahan.
Potong gaji min tellu.
Kak minjak kemawasan.
Sepatu cakak hulu..

>lain moneh mak ngemik.
Say lapah ketenganan.
Mansa jukhagan bettik.
Ana gelakhni khawan..

Mengan, penganik bangik.
Gaji, di bayakh juga.
Ngikhim di anak khamik.
Togok citta kahaga..

Kak togok kontrak bella.
Mulang kipak sebulan.
Jukhagan kukhang khila.
Miwang tiyan sang-kaban..

Kham di anggop sekelik.
Lain di anggop babu.
Kidang wadani cutik.
'Sekhatus cabuk pitu..'

>induh kapan kham mingan.
Goggoh Negara bakhih.
Melamon kekhajjaan.
Rakyat mak lamon jekhih..

Hukum khik pembangunan.
Say adil khik mekhata.
Togok di pemekonan.
Dang unyin di Jakarta..

Kuat pemekhittahan.
Tilah Rakyat ni bangga.
Dang jadi pukalahan.
Segi apipun juga.

Adek, puakhi, indai.
Khadu lamon buktina.
Tulung ti pikikh ko pay.
Sesol mak ngedok guna..

Bekasi, 17 maret 2011
Hendrik Semaka.
*salam jama puakhi2 say lagi merantau di Malaysia, Arab saudi, Korea, Japan khik say bakhih...

Tabikpun..