CerBun: "PENGILU NI AJJONG"

Khadu setahun mak mulang pekon, nyaniko jippang ni cukut ku mak mingan legoh. Mawat ki nyak tegakh. buhung moneh ki nyak hambokh, dibbah jak mubil jurusan Bakau Heni-Kota Agung. Tikham di unyin tiyan dilamban. Emmak, Bak, Udo, dalih Ajjongku..
Kipak Udo jak nyilau Nyak di sebekhang, kidang khadu pitu bulan say liwat. Khadu tikham jama petuah dalih awak ni Udo.
Nyak ingok bulan khuwah say liwat, Udo ngebalos smsku: 'cengeng..!'. 'ija gelluk mulang, nyin niku sunat moloh..'
padahal nyak ikah sms: 'mak sabakh, nunggu bulan syawal..'
ha.haa.. Sms na Udo, konyol kidang mendidik. Hinnolah say nyaniko Udo 'kawan sekaligus lawan' ku di lamban..
Alhamdulillaah mulang lebakhan munyai, khik mingan bupedatong jama Emmak, Bak, khik Ajjong.
Udo, sengaja mak ku pedatongi injuk lebakhan tahun say liwat. Tagan, nunggu pengilu na gawoh.
Pekhnah tumbay kupedatongi kawai helau. Udo malah ngelelaju: 'tihakhiko, kak haga moloh mid Jawa, ngegadaiko Hp'.
Nyaniko kelalangan bingian takbiran lebakhan dinana. Semula jak sayya, mak lagi kupedatongi. Bacak nunggu ia cawa. Sukukh ki ia bupungatu di-Nyak.
Sejakh Nyak di atas angin. ha.haa...

*seminggu say liwat, sekhadu jak bagi THR, lain hinjang atau ketupung say kubeli.
Sekhadu jak ATM, Nyak langsung mid toko alat rumah tangga, ngebeli batre atau senter say balak pakaina Ajjong..
'nyin tekhang, kak haga benyulu subuh di sumukh..' Hinno alasan na Ajjong. Cawa, lebakhan tahun say liwat.

*Khadu jak semahapan, Nyak langsung mandi di kudan. Kekhasa iyos ni uway sumukh sanian na Among almarhum.
Suakha takbir khadu ketengisan anjak mesigid khik sukhau di pekon.
Udo, khadu lapah takbiran pujama indai ni.
Khadu jak balin khik mengan, nyak langsung ngakuk tas jinjing say pagun tekhogok di gekhil lemakhi di khedik mija tv.
Bak mejong di sofa. Mak benni Emmak luwah jak dapukh ngebatok uway kupi dalih gukhing hubi kedemonan ku.
Ajjong pagun mejjong di ilat jak katti nyak togok menggekhib kakhu..
Kubukak resleting na sambil Nyak senyum2 haguk tiyan.
'api ano wih,..?' Hani Bak dalih ngelunik ko suakha Tv.
'pedatong laah..' haku.
Kuluwahi sai-sai pedatong.
'ajo ketupung pakai na Bak'. Sambil nyak lapah ilung mija. Kuppik ko di gekhil ni pengajangan nginum.
'wah, massa jatah moneh, Bak. tekhima kasiih..' hani Bak dalih ngehikhus way kupi.
Nyak ikah senyum, moloh mid tas luwot.
Ku akuk hinjang say kubeli pakaina Emak.
'naa, ajo pakai na emak'. Kukeni ko di emak say mejong ujukh2 di gekhil na Ajjong.
'api wi, hak bupedatong juga. Mak usah kik duit na mawat..' hani emmak.
'aah, setahun pissan Mak..' haku.
Nyak takhu sekhabbok di gekhil na ajjong.
'Ajjong mak massa' Haku bugukhau.
'aah, mak api2. say penting niku munyai tuwah...' hani ajjong.
Nyak lalang.
'uwat jong, khusus pengilu ni Ajjong tahun say liwat..' Haku, sambil nyak moloh mid Tas. Kuakuk batre pakaina Ajjong. Kukhatongi ajjong.
'api wii, pedatong di Ajjong..?' hana Emak, penasaran.
'ajo ajjong, batre say balak so. Pakai na Ajjong kak haga mid sumukh, subuh'.
'owh, payu tuwah tekhima kasih' hana Ajjong sambil miwang. Sedih menok Ajjong miwang. Ditambah suakha takbir say kasakh khamik.
'mak api2, jong. Nyak kilu mahap, lebakhan say liwat mak laju kubeliko..'
Emak moneh miwang.
'acak kuti miwang lah Mak..? dalih Nyak ngelap luwoh, liyom di Bak say pagun mejong disofa.
'Batre no segok ko gawoh..'. 'Ajjong mu khadu mak menok lagi'. Hana Emmak.
'tawit Ajjongmu kik haga benyulu di sumukh...'
Nyak ikah tesondom, pagun miwang..

*Mak tekhasa, khadu pukul tellu subuh.
Khadu lima jam Nyak ikah pepedoman di kamar tenggalan..
Pepikha indai khatong kekikha jam sepuluh say liwat ngajak takbiran. Kidang mak kupayu ko.. Suakha Hp pepikha kali kebunyi, kutaganko..
Nyak ingok setahun say liwat. Bingi ketellu lebakhan. Pas Ajjong cawa kebelian batre...
'kik jimmoh mid pasakh, tulung beliko Ajjong batre say balak ya..' kilu na Ajjong.
'Ajjong kan khadu uwat batre,..' Haku.
'iya, kidang kukhang tekhang, lunik ga..'
Hani Ajjong.
Mak benni Hp ku kebunyi. Kuliak jak indai di duwakha dunggak.
'jadi mawat, jimmoh kham memidokhan mid Tekhbaya, so..?' suakha jak ujung Hp.
'owh, ya jadi. Jadi..!!' Haku mastiko khencaka sikam, memidokhan. Khadu jak basa basi, telp di tutup.
'iya Jong. Jimmoh kubelliko..' Haku dinana.

Kidang hinnolah say jadi habaku. Togok Nyak moloh mid Jawa, mak juga Ajjong ku beliko batre,..

*pukul 4 kukhang 10, menit, Suakha khangok ni Ajjong kebukak. nyani nyak sadar anjak lamunan setahun say liwat. Kubukak khangok kamarku pelegohan..
Kuliak Ajjong luwah jak kamar, ngekhaba2 di sassai..
Sangun kutunggu subuh pissan jo. Haga nawit Ajjong mid sumukh. Kidang cukut ku lemoh, tuwot ku mak butenaga.
Sedih, sesolan cappukh jadi sai.

"mahap ko uppumu, Ajjong...''


PUPUT.



note's:
>Dipepikha daerah, lebakhan disebut 'buka'.
>Sebagian sastrawan khik masyarakat, nulisko 'KH' makai 'GH' atau 'R'.


Bekasi, 07 februari 2012
Tabikpun..