wayak: "KELASA BULELIDUNG"

Injuk hanipi..
Khejeki ku bingi sinji mak tanggung-tanggung.
Puhayak muli batin.
Lom kelasa nyambai, ditayuh agung.
Kuliak niku Adik kahud.
Muli sikop, anak sebatin Kuta Agung.
Abang selang semintang.
Niku muli baya, senggayakh di lelidung.
Dakha helau khik waya wanggamu Adik.
Nyani kedengak, injuk patung.
Goh Cendrawasih.
Niku kinjuk ya bukhung.
Mata lunik, kulik handak, bu-ikhung mancung.
Bibikh mu suluh, buhinjang tapis.
Buwok mu halom kejung.
Haga kubaca kipak cutik.
Mammang ku, mak ki ukhung.
Tengeni na Tamong, di cukutni Gunung Seminung.
Kubaca jak jawoh.
Nyin niku gusakh, mak mingan hamma, khappa lindung.

Bingi jo dakha ngison, hani indai.
Kidang mak kukhasa, kipak diluwah labung.
Mehandop khayya lom kelasa.
Ditengah lapang, lamban panggung.
Dihak lom, dikhedik kebik.
Suakha rebana, tala kekhumung.
Muli mekhanai sesimbatan.
Lagu ni lawi Ibung.
Lalang waya, bu ikhing takhi.
Di seling suakha gamolan pekhing, dalih gung.
Jak ipa-ipa muli mekhanai khatong.
Kukhasa ikah kita khua sai tehambung.
Jak selekhmu nyak pandai.
Khasa gekhing khasa kahud, khatong lijung.
Bupapenyin telaju hanggum.
Ngeliak nyak bukatupung tapis, bulipat hinjang tajung.


Tulung cawako kahud, api do pengilu mu.
Khepong tupak, kebau-jawi, api jukung.
Pakhi dakhak, kebun lada, apikah sawi jabung.
Ki hellu ni kilu, tagan usung kok lesung.
Hulun tuhaku, kahud.
Khadu jak nanok, busakhangan, nutu gelepung.
Ngegaduh manuk, ngandan semuli, khik siwok khua kakhung.
Cawako pai Adik, di Pak Batin tiyan.
Abang setemon kahud, mak ki buhung.
Kulapahi kipak ya bela, isi ni lumbung.
Kuhata ko badan, najin ya badik mak bu-sakhung.

Kahud, kanak ki niku khadu makku.
Mid dipa ipa ku usungi tudung takung.
Haga mandi, sabun anduk mu tagan ku usung.
Mengan ku posok, gulai tangkil pajak tiyung.
Pedom mu kujaga, nyin lollok.
Kipak kham bupiyu kakhung...

(Bekasi, 13 maret 2012)
Hendrik Semaka.