wayak: "MAK GANTA KAPAN LAGI''

Tabikpun ngalimpukha.
Jama kutti puakhi.
Ajo haga nyuakha.
Nyappaiko isi hati..

Budaya lampung kaya.
Melamon di khicci-ni.
Wayak, pattun segata.
Sekiman, adi-adi..

Najin kipak ya khiya.
Dakkung kham waya hati.
Mak setemon tijaga.
Ninggok lebon jak bumi..

Cawa ahli budaya.
Tibaca dija dudi.
Budaya kham ji ganta.
Hati tyan, 'mati suri'..

Budaya ni keduwa.
Kukhuk jak kanan-kikhi.
Lain angkah cekhita.
Ulih lamon bukti-ni..

Dang moneh putus asa.
Kipak khanno nyata-ni.
Lagi dapok ti gaga.
Asal kham ngemulai-ni..

Lapah kham indai kanca.
Jejama ngangon konni.
Kilain kham ji, sapa..?
Mak ganta, kapan lagi..?

Jama tiyan say tuha.
Punyimbang, dalih ahli.
Belajakh khik butanya.
Lapah kham ngemuak ni..

Lebon ko cela wada.
Budaya lamon khinci.
Ngebebalak ko haga.
Khadu mak zaman lagi..

Lampung kaya budaya.
Mak gegoh dija dudi.
Say penting kham nyemuka.
Dang lamon pusenggikhi..

Kuwa lagi mengukha.
Lagi calak khik bani.
Sani guwai say nyata.
Mid dipayya ilung ni..

Semapu di budaya.
Lapah kham pelajakhi.
Mak paham kham segata.
Lapah, belajakh takhi...

Piccak khakot, bedana.
Sekura moneh ngasi.
Mak pandai di unyinna.
Cawa lampung, goh jadi..

Jejama kham bu du'a.
Kalau tulus menjadi.
Budaya kham melana.
Togok di umpu nanti..

Dang sappai jadi haba.
Budaya kham mak lagi.
Ikah guwai cekhita.
Pengattak buhanipi..

Khadu pay antak ija.
Cawa isi ni hati.
Tabikpun sikindua.
Jama kutti sunyinni..


Bekasi, 10 jan 2012
Hendri Semaka.