Bulung. Khadu mak ngedok tiyak ni imbun.
Kinandi imbun pakai kham nginum.
Tunas. Khadu mesaka jadi kepunggukh.
Padahal jak tunas kham mingan mujuk.
Pucuk. Khadu benni jadi keliang.
Najin pucuk, suwa kham mengan.
Hihhuk bukhubah jadi hasok.
Tanoh mak bu-Litak.
Kekhing.
Segaga haguk sikhing...
Kham juga gegoh,.
Seha-henna bujegol.
Pusang...!
(Bekasi, 25 febr 2012)
"MALIH...'
Nyak pekhnah bela luwoh andahmu.
Pekhnah tesondom nyak bupungatu.
Lebon hakal ulihmu.
Kuhanggumi niku, goh hanggumku di matakhani..
Sejajakh haguk bakha..
Setekhang bittang,. Sekhupa jama sekhunih.
Tanno Nyak ni sakik kon.
Cawamu nyayak hati.
Induh, wat pusenggikhi.
Api sangun gekhing mu mak lagi..?
Malih, kundang..
Ki kita mak setiti.
Ngakalau nyak dapok, nyippok say bakhih hati.
Kipak mak jimmoh.
Halok mawat ki sawai.
Ku penahko. Togok lebon kok halinumu..
(Banten, Jan 2012)
"MUNGKIKH"
Putit puwok khadu kakhi mulang.
Bakha moneh khadu kepellok lapahan.
Meliyom nyak haguk cecikhik.,
Khadu induh pikha jam nunggu niku..
Kutata di khelom bingi; acak niku mak khatong..?
Ia, digok.
Kulih-ulih haguk bittang.
Menapi kundangku mungkikh..?
Tiyan mak pandai.
Kutanya jama kaban hampulap.
Tiyan ngehamma dalih lijung.
Kundang...,
dipa janjimu haga khatong..
Ngusung tikham bubekom-bekom.
Ngebatok khindu bubilang-bilang.
Mak kunyana, niku mungkikh di janji.
Nyani kahudku lebon.
Nibatok angin bingi...
(Bekasi, 28 febr 2011)
"TANOH KHAM"
Ajo tanoh Lampung.
Bukuta mammang khik du'a.
Tanoh tenglangikh ni malaikat..
Ajo tanoh butuwah.
Lain tanoh butulah..
Ajo tanoh gumbu.
Lain tengilu astawa tenghalu..
Ajo tanoh kekhamat.
Api say mawat..?
Ditanoh jo tanno.
Mak lagi ngedok 'sikam'.
Ditanoh jo tanno.
'kutti' mak lagi.
Ditanoh jo tanno,
say uwat adalah 'kham..'
Lapah jejama..
Dang ngesai kibabah, kidang hati mak titatah.
Ngesai ki cawa, kidang khua di kahaga.
Jak unggak, jak doh, kikhi khik kanan..
Hinnolah kham.
Bida warna, semapu khupa, hinnolah kita.
Mak mingan kodo..?
Kham mengan senga pelambakhan.
Sangakebun kham budakhak.
Sang kelasa kham buguwai..
Khadu'i pay, nebekang culuk.
Puhahejak, putunjuk-tunjuk.
Ngapulaju, pudaku-daku..
Ditanoh jo tanno, mak ngedok lagi 'sikam'.
Ditanoh jo tanno, 'kutti' juga mak lagi.
Ditanoh jo tanno, say uwat adalah 'kham..'
Tanoh Lampung, tanoh kham..!
(Bekasi, 27 febr 2012)
"BUDAYA KITA, GOH PULLAN TUHA"
Khepong tumbay khadu jadi pullan tuha.
Mesaka Nyak tejajau
dipullan say mak lagi bukuta.
Di kayu-kayu si bakakni cuwak khanggak.
Di wayit-wayit ngelik say ngelillik.
Khepong tumbay khadu jadi pullan tuha.
Tangih haga ngunduh buah say mesak.
Kok say ngukha mak sepikha.
Say putik juga bilangni cutik.
Bella hakhap ku di pesi. ulih pesi juga gulik mati..
Budaya kita, pullan tuha.
Mak pandai nyak ngikha-ngikha.
Hippa tebu hippa tembiyu.
Api bidana lassak khik ketupak.
Induh, hippa pegaga hippa jukuk jaba.
Punyimbang, beliawan..
Pusikam say tumbay nyusuk bubukak dija.
Kidang, luyut kutti khuppok induh dipa.
Khadu lebon nitutup liyoh.
Pusikam say tumbay
negak kubu dija.
Kok penugungan ni khadu mak lagi.
Mesaka bella nikanik hani.
Pusikam say tumbay nyani pakkalan mandi.
Pancukh ni induh mak lagi.
Khadu lebon, ni tutup khakak khik jukuk teki.
Nyak tejajau, ku dudu mawat nimbal.
bu koddo jama sapa.
lapah ku ilung ipa.
Nyak tejajau, dipullan tuha..
Budaya kita goh pullan tuha.
Semapu tanoman tuwoh dija.
Khilako Nyak nangguh ngebukak ya.
Negak ko kubu pakai kham tehabu.
Kanah, kak khadu jadi khepong
kham mingan ngunduh, nganik jejama.
Kusani pakkalan kita luwot.
Najin pancukh ni kawokh ngukha.
Paling mawat, kham mingan nginum, mandi.
Dalih benyulu pujajama.
(Bekasi, 01 maret 2012)
'GUMAKHANG'
Nyak lain dekhuyyan pullan.
Lain semuli temekhom nambi.
Nyak biah diluppak sabah...
Kinjuk siakh, Nyak siakh bingi sehakhi.
Lain siakh ni pagi
lain moneh siakh ni debi.
Tangih haga siakh ni tegi khani..
Sikindua lain kebik astawa tengah lapang.
Jawoh umpama, kukkup ni penugungan.
Sikindua sakhangan dibah lamban..
Sikindua.,,
ikah tiyak di lawok bekhak.
Lain lubuk jengan mu mandi.
Lain mata wai sungimu sundai..
Umpama bakak, Nyak bakak khakak.
Lain tembiyu, lain bakak ni awi.
Tangih Nyak huwi, pakaimu nali...
Niat kubabai mak kebadanan.
Kutawit mak sejenganan.
Haga ku sumpik mak kedako'an.
Nyak puwok nenggakhah bulan.
(Bekasi, 14 maret 2012)
"HUMAKHA"
Haccong do niku kahud didasokh lawok.
Kusekhumahko, niat sikam bulamban di umang-umang bah kakhang.
Ku-kubukh ko hakhapan ku di henni handak bah batang bakhu.
Dang miwang kutti humbak..!
Cukup hapus luyut sikam di pesisikh mu jo.
Nyak mulang, nyippok humakha sumang..
Bekasi,07 April 2012.
"KANAH"
Kanah niku pandai, khappa kahudku.
Nyak mak mingan ngemuaq konna..
Lamon,,
lain cutik.
Ki kahudmu lamon kukhasa..
Dang niku cawa, kanah.
Banno pilih ku sumang..
Cawako tanno,,
kuwa na lagi hayu.
Semakkung bukhubah pikikhan ku.
Cawako ganta,,
kuwa nyak lagi dija.
Nunggu conggok khik hati khila..
Bekasi, 25 Desember 2009
tabikpun..
Hendrik Semaka
Tidak ada komentar:
Posting Komentar