wayak: "PAKAI NI BAKAL"

Bismillah pay muaq ni.
Tabikpun ngalimpukha.
Ajo wayak kusani.
Pakai kham sanga Makhga.

Kutuju ko mid kuti.
Say tuha khik say ngukha.
Say wat niat di hati.
Jadi pemimpin Makhga.

Kantu nyomokh Bupati.
Gubernur, Camat pukha.
Caleg D.P.R-RI.
Presiden, Walikota.

Bulatko dilom hati.
Helau niat khencaka.
Ki niat mak sebudi.
Kalau ni dukung Makhga.

Sapa ya kuti Wakhi.
Say niat jadi jamma.
Kah lehot ku di kuti.
Majuko Anak makhga.

Jak ipa ya asal ni.
Jak Pepadun umpama.
Sebatin juga ngasi.
Asal Lampung judul na.

Khedik jama Ilahi.
Sumbah jama say tuha.
Kalau tulus menjadi.
Sikindua bu du'a.

Kanah ki kuti jadi.
Ingok do di say kuasa.
Lukhus-lukhus ko hati.
Dang sampai kena guda.

Dunia kasakh bani.
Guda'an dipa ipa.
Kekala khupa Muli.
Atau amplop khik banda..


**
Tilah senang di hati.
Ki Lampung goh kedua.
Sunyin anak negekhi.
Lapah, sai ko suakha.

Kaban puakhi tani.
Sunyin ni Mahasiswa.
Say Dagang, Supir, Kuli.
Lapah dukung jejama.

Pilih do, say pastiti.
Dang pilih sembekhana.
Ulih ulang lajuni.
Pagun khugi di kita.

Kanah ki tian jadi.
Dang lamon cela wada.
Kham ti dukung program ni.
Halok wajib hukum na.

Kidang ki ya korupsi.
Pilih kasih di makhga.
Ku khasa mak salah ni.
Jejama ngingok ko ya.

Payu khanno puakhi.
Wayak kham antak ija.
Kekalau wat guna ni.
Alhamdu, puput cawa.

Tabikpun...

Hendrik semaka.