wayak: "GIMBAK TANOH UNGGAK"

oleh Hendrik Semaka pada 14 Mei 2012 pukul 18:29 ·

Ingok kala dinana.
Tahun sembilan empat.
Mawat tinyana-nyana.
Kukuk di Lampung Bakhat.

Bela sang Buway makhga.
Lamon say mak selamat.
Jak upi togok tuha.
Unyin ummat Muhammad.

Tepat di kota Liwa.
Bumi bugimbak hebat.
Bangunan lamban khata.
Dunia goh kiamat.

Tengah bingi puasa.
Khatong mak makai pakat.
Ujian say kuasa.
Sekedau sunyin jagad.

Wat sanga lamban tuha.
Pak sai, mawat selamat.
Melamon say binasa.
Hukhik kidang sekakhat.

Ngedudu sanga kaban.
Miwang buganti-ganti.
Mak mingan setulungan.
Budu'a dillom hati.

Mayit mak keculu'an.
Khawang dija khek dudi.
Lamon mak kehaluan.
Lebon bukhani-khani.

Anak makhga jukhagan.
Sesippo'an puwakhi.
Tanoman, gegaduhan.
Bella ni telon bumi.

Uwat do say mekhawan.
Munyai juga badan ni.
Tukhun ya ngekhanyaman.
Ina Bapak mak lagi.

Khanno do ki ujian.
Tuhan jama hamba-ni.
Semapu di cuba'an.
Musibah lamon khinci.

Kantu kuat ko iman.
Jama Ilahi Robbi.
Lain ano hukuman.
Kenyin kham ngaji dikhi..


Tabikpun...
Bekasi 14 mei 2012.