PUISI-PUISI LAMPUNG (tiga)

"KENUI DUNGGAK KEPUNGGUKH"

Suakhamu mak lagi hatang.

Pemenokmu mak lagi tekhang.

Bulu kepi mu gulik makhkhuh.

Kelejuan tehabu dunggak kepunggukh.

Gundang mu melamon gugukh.

Kebenian pedom disalaimu say mesaka haccukh..

Mak lagi niku habang dunggak pumatang.

Sehahaga nyani salai di kayutung.

Mekik mekayung, digunung-gunung..

Ngukhau..

Buhakhap..

Ngeni pandai haga labung..

Tabik,,

Kemakhau, 17 september 2012.

''DIJA"

jamma-jamma dija khadu payah pujama.

Semapu guwai sedunna-dunna.

Sekuta khapot dilangan.

Sekhanggal-khanggal disassai, sekuta kawak tengbeli jak jawa.

Pekon, cutik lagi bukhubah kota.

Setaguan khadu mekhalang.

Seanjauan khadu mejakhang.

Senyum kimut juga khadu siyut.

Tutukh khadu mak ke-atukh.

Say tuha payah ngehija.

Mak lagi nganggop say ngukha.

Say ngukha juga khadu khappa hana.

Mak benni lagi, pekon kham khappa kota.

Tabikpun..

Lampung, 10 Agustus 2012.

''KHUCAK''

Candung-candung mak busakhung.

Pedang-pedang ngebekhinang.

Khasa kasihan mak lagi kebilang.

Menok musuh khappa binatang.

Mata-mata ngebekhilot injuk haga ngebelot.

Khekhami'an, bupuluh, bukhatusan.

Bani-bani ulih lain tenggalan.

Nutuk, kipak kung pandai iluk.

Makhah, kipak halok kuti say salah...

Bekasi, Agustus 2012

''PEMEKONAN''

Nikhah cutik, cahya sinja kuning gading.

Sekhabbok lagi, matakhani kukhuk di kebik.

Gegaduhan kukhuk keladangan.

Bukhung-bukhung budandi di khatting kupi.

Bakas-bakas singgah jak huma, mandi di pakkalan.

Sekhadu ni benyulu di paccukhan.

Ngenan ko 'Bang di sukhau-sukhau.

Jejama sembahyang se'imaman.

Mak mesaka, sanak-sanak lapah bu'ikhingan.

Ngedakok sebekhah isi Alqur'an dalih tukhutan.

Wat moneh say tegakh, sepupuhan.

Tuyun, mana ketupung ni di akuk khik ni memainan..

Marbut khadu nyuwah lentikha-lentikha di sassai sukhau.

Lepas menggekhib, sanak-sanak mulai galut.

Sehahatang belajakh ngaji.

Ni tengot gukhu bugatti-gatti.

Sappai togok Isya.

Semakkung tiyan mulang bebakhongan.

Ni sussung Abang kemaman.

Makai obor khik sunakh tengusung jak lamban.

Banten, Agustus 2012

''HAYU BUKA''

Dunia lebon suya.

Angin iyos nana.

Mehayu manjau bupedatong siakh matakhani.

Ni bakhongi suakha takbir jak nambi debi.

Hiwang mu bupadu di hanjak ku.

Mak sabakh Nyak ngeni pandai di tiyan say nunggu kabakh.

Ngebagi hanjak kipak mak panjak.

Bekasi, 1 syawal 1433h.

''MOLOH''

Ku olohi mid khangok pengahut mu.

Buhakhap,

dapok pujama, injuk say khadu.

Moloh jak kepelok duakha say pekhnah kulapahi.

Dinana, appai pandai.

Pujawoh Nyak mak kelai.

Bekasi, 19 september 2012

"SELASSANG MANJAU GAKHANG''

Dakha beni mu kahud malih jak lamban.

Liyak pai..,

kebik kham kengingian.

Tengah lapang kehiyonan..

Keliang bubilang-bilang mak nungga salang.

Niyu khik sapu bubulan-bulah tehabu.

Uyah di paccung mak lagi bubukuh.

Jadi wai, metiyak di khakkalan.

Lain kah khekhebuk menuhi kudan.

Dang mutanya api kabakh ni panggakh khik bah lamban.

Kok selassang khadu manjau di gakhang..

Nyak kah buhakhap lain bukilu.

Kah nunggu lain bupengatu..

Jimmoh Niku mulang.

Atau sawai kham siyang..!

Gisting, Agustus 2012

Hendri semaka.

TABIKPUUN..