wayak: "PACEKLIK"

Sangun aneh, pemekhittahan khik cukong2 di negara kham jo...
Ki musim togok, seunyinna mak bukhegga. Induh kupi, induh cakkih khik lada..
Mapas..!!

Na payu pekhwatin .., lapah kham cuba jejama, muwayak na:



Ajo wayak puakhi.
Guway jadi angonan.
Geddah ni kham petani.
Santokh mak kecukupan..

Paceklik khatong manjau.
Kekukhangan pemengan.
Injuk musim kemakhau.
Mak buway koq bandongan..

Paceklik nyani susah.
Sang Buay sanga Makhga.
Dunia lamon sabah.
Kidang bias ni dipa..?

Nginjam mid dija dudi.
Najin bayakh bulipat.
Ngedudu tengah khani.
Hukhik tambah melakhat..

Kupi lada bukhegga.
Ki-paceklik jo togok.
Jak khua jadi lima.
Nyani podokh goh 'hotok'.

Khegga cakak mid langik.
Kidang bakhang ni mawat.
Say cina tambah bangik.
Lappung tambah melakhat.

Kapan kak musim khatong.
Khegga ni mak sepikha.
Say cina mengan betong.
Petani nambah 'lakha'.

Musim khadu mak lagi.
Ngebukak pembukuan.
Hinji pakai koperasi.
Hijjo bayakh ijonan.

Kinandi ulih api...??
Ki paceklik jo, luwah.
Mahal koq pucuk hubi.
Khappa laju kham kidah..

Kantu payu puakhi.
Sanga Buay sang Makhga.
Kak togok musim nanti.
Paceklik dang kilupa..

Dang unyin ni ti belli.
Ki-kah ngabelli hada.
Nyesol khatong ni dukhi.
Hukum alam gelakhna..

Ulih melamon kita.
Kak musim, jadi 'cadang'.
Tibelli unyin citta.
Injuk mak bakal kukhang..

Kebun ti silau juga.
Dang ti silau kak musim.
Tanom kupi khik lada.
Putti, cabi, khik kikim..

Kalau hasil wajjuga.
Ki kebun kham ti andan.
Sapa pandai bukhegga.
Mingan kesani lamban..

Ki say khadu wat lamban.
Mingan kham cakak Haji.
Anak sekula kaban.
Tilah sennang di hati...
Amin...


Tabik puuun...
Banjakh manis, Gisting. 2010.