cerbun：”PENAHAN DI BATU BALAI”

*
Khadu induh kebilang na, Zaki nyilikhan mid jam tangan Tissot say nandok di culuk kikhi na..
Pudak handak khik tanggom na bukhubah ngebekhucut dalih makhah.
Khadu telu jam Zaki bupawai di siakh ni matakhani say mulai ngehandopkon ubun-ubun.
Mejong di batu kakhang, ngehayak lawok di pesisikh batu balai.
Umang-umang lelapahan di hantakha cukutni sai basoh andahni way lawok.
Khukuk say pegung di jakhi kanan geluk bella ni sebu angin say khatong jak tengah lawok..

**

Semapu pikikhan ni Zaki campukh aduk. Sabakh menah, buhakhap, nyuwoh khik makhah jadi sai.
Jak jam walu mehayu ia nunggu kekhatongan ni Dila.
Muli say ni kenal liwat 'sahabat pena' di Majalah Budaya Lampung.
Khadu pitu bulan tian butunang khik bukundang.
Najin kung pekhnah putungga,. Tian khua khadu kenal nihan.
Bucekhita, setanya kabakh dalih bujanji haga setemonan.
Unggal minggu tian khua sekikhiman sukhat. Bukikhim photo, wayak, dalih puisi-puisi khik segata Bahasa Lampung.
Pitu bulan nikhasa tian khadu cukup haga setungga'an kebian jo di Batu balai.
Pantai say kecah dalih helau mak jawoh anjak pantai Tekhbaya Kota Agung..
Setunggaan khani hinji khadu dipakati tian jak jawoh hakhi.
Disukhat say di tekhima Zaki nambi, tian khadu sepakat jengan ni, jam pikha, khik kawai api say haga nipakai tian khua. Kipak mekhisok bukikhim photo, kidang tian khuwa makkung wat pekhnah putungga kipak sekali.

Kidang nyatani Dila mak khatong. Lebon hakhapan ni Zaki haga bukundang setemonan togok bulambanan, sesuai janji ni tian khua.

 
Ganta khadu bela sabakh ni Zaki.
Minjak Ia, jak hejong ni. Nguttaiko sepatu say sabakh ngekhi'i iya anjak mehayu..
Mulang. Ninggal ko luyut di heni handak, khik hakhapan say khadu puput.
Sambil lapah ilung khang parkir motor, ia ingok jama Imron. Indai say sebingi cawa haguk iya.
"kihaku, dang lamon ga buhakhap, niku Tek. Dila no, kan ikah kenal liwat sukhat. Yaa.., Kidang kekalau ia khatong nungga'i niku jimmoh.." khanno hana Imron
Temon moneh, ganta hancukh unyin hakhapan..*

Sekhadu jak bubalah sekhabbok haguk tukang parkir, Zaki langsung nge-gas motor ni kincong.
Jak suakha motor ni, muli mekhanai say memidokhan kebian no pandai, sekedau ni lagi mak bangik hati. Ngebut.. luwah Jak pantai Batu balai.

*
Diperumnas Kemiling tanjung karang, mak jawoh anjak Terminal...
Bendera kuning anjak kekhtas dipasang di tengabbah khik khelaya nuju mid lamban say khekhada balak anjak say bakhih.
Bebai-bebai tuha ngukha, walawikhi ngusung cepun bututup sebekhah.
Tarub khik kubu khadu mesaka budikhi.
Kekhanda moneh khadu dikhatongkon anjak mesigid.
Pepikha khagah bukatupung ngobrol setengah sesiahan di gekhilan lamban...
"kasihan moneh Pak Balak tian ya mamak.."
"Anak hahana.., dipa ampai khua bulan anjak wisuda..". Hani Ahmad.
"yaaa., mak nyangka.."
"Haga kejung hiwang khek batuy ni tiyan"
Timbalni khagah say di ukhau mamak..
Haji Ishak, say lamban ni lalat khua anjak lamban say kecadangan, mak benni nimbal..
"iya. Khannolah umukh. Kipak say mak Kham pandai, kapan ya khatong.."
"semula kham harus selalu ingok di mati."
"hinnolah maksud ni kham kumpul dalih takziah kebian ji.."
Pepikha khagah say nengisko ni conggok-conggok. Tanda setuju..

Dilom lamban, hiwang bubisok mak setakhuan. Pepikha jamma mejong, ngaji yaasin khik budu'a ngelilingi mayit say khadu di bungkus kain kafan..

"ya Allah, khappa lah Minan,.. Semula bang injuk kheji..??"
Hani bebai ngukha butanya jama bebai kekikha umukh pak ngepuluh tahunan, say mak setakhuan miwang ngehayak mayit..
"induh, Nakan..? Menapi bang injuk khajjo nasip sikam Mamakmu..,"

 
Lelegohan, iya bucekhita dalih bubisok...
"sekhadu sikam jak ngekhappokh bakhong, jam walu pagi jinna ia balin. Jak sebingi so ia nangguh, haga memidokhan mid Batu balai.."
"Muaq ni mak tikeni. Kidang kupikikh sikam Mamak mu, appai muaq na hijjo ia nangguh memidokhan katti na kuliah. Semula ku khila ko sikam iya lapah..."
"Mamakmu kok say manas ko motor na, semangkung ia lapah"
Hani bebay hinno sambil ngelap luwoh..
"kidang mak kusangka nakan.."
"kung genok sejam ia lapah, sikam di telpon Pelisi. Nyawako ia mak lagi, kecelakaan.."
"yaa Allah, anak ku Dila..., niku mak lagi kahuud.."
Hana emak na Dila sambil musau pusau culuk ni say khadu sedakop dibungkus kafan...
Sementakha Bapak ni kelia'an bunjak tabah jak say bakhih
Mak setakhuan ia istikhfar, sambil kekala menok photo say nandok di sesai lamban..

***
khannolah..., gakhis ni Tuhan.
Janji ni Dila jama Zaki, haga setungga'an, kah mingan ni tepati togok khelaya, mak jawoh anjak lamban ni..
Sementakha nyuwoh khik suya ni Zaki mak bakal bella.
Bakhong jama puput na, penahan ni Zaki di Batu balai...

ＰＵＰＵＴ.
Bekasi, 26 maret 2012
Hendri semaka.

wayak: ''BANGIK’’ (ki khayya juga)

Ku khasa sangun bangik.
Ki lagi ketattangan.
Najin di kubu khupik.
Kidang lapang angonan.

Anjak lagi kemutik.
Sangun khadu ti andan.
Buguwai mak sebinjik.
Kelabung kepanasan.

Kinandi nahun cutik.
Kidang buwah lumayan.
Khega cakak mid langik.

Gedah ni kemujukhan.

Nambi badan ngelikkik

Tuppak tangi tenggalan

Handop Hati khik kulik

Duit kedol bah sullan

Lamon inday khik kantik

Manjau mak setakhuwan

Angkon ketutuk samik

Ulih kham lagi khawan

Seunyin ni sekelik.
Khanno do pengakuan.
Say jawoh kasakh khedik.
Jak nyuwoh, setaguan.

Kelalah duwit lunik.
Payah nyepok khibuan.
Bumacom khang na tippik.
Khadu mak ka ingo'an.

Cukup sunyin penganik.
Kilagi telu bulan.
Pekakas sekhba betik.
Nutuk model khik zaman.

Hanjak inggoman nyuwik

Khayoh kecah tengandan

Lupa kok candung kawik

Tekhinat di gekhilan

Mak lagi ngupi pahik.
Semapu di kani'an.
Bugulai daging kitik.
Lupa di bebulungan.

Kebelli hinjang abik.
Gatti kawai balinan.
Nguwat ko say mak ngemik.
Nekan ko pekhetto'an.

Debingi kukhuk kebik.
Dayit-ayit inggoman.
Anak say ngilik-ilik.
Kak khadu, se suppi'an.


Bekasi, 02 April 2012

 
Tabikpuun...

Hendri Semaka

Segata：’’BIYAH PINGGIKH WAY’’

Bulan induh kebilang.
Tahun nyak khadu lupa.
Kita khua mukundang.
Khadu benni hantakha.

Khadu benni hantakha.
Mangkung juga pubandung.
Lantakhan hulun tuha.
Yamula khasan ukhung.

Yamula khasan ukhung.
Say tuhamu ngehalang.
Ibakhat ni nyak jukung.
Bulayakh pukakambang.

Bulayakh pukakambang.
Mak nantu di hakhungan.
Angon ku ganta cadang.
Sakik ni punyandangan.

Sakik ni punyandangan.
Mak gegoh di keduwa.
Niku anak jukhagan.
Cukup segala-gala.

Cukup segala-gala.
Bangik segala guwai.
Niku kumbang cempaka.
Nyak biyah di pinggikh wai.

Nyak biyah di pinggikh wai.
Mak buguna diniku.
Mula say tuha khabai.
Ki judu kita temu.

Ki judu kita temu.
Lamon say khambak hiwang.
Yamula ni ki haku.
Bacak kita pulipang.

Bacak kita pulipang
Sepok judu say bakhih
Kekalau niku senang
Dang lagi nyak di liwih

Dang lagi nyak di liwih
Khadu pay kisay khadu
Mupuh luyut khekhunih
Khetiko pay andah mu

Bekasi, 14 April 2012

Tabikpun..

Hendri Semaka.

wayak: "INDAI"

wayak: "INDAI"

oleh Hendri Semaka pada 6 April 2012 pukul 1:05 ·

Api kabakh mu indai.
Benni kita mak tungga.
Kekalau niku munyai.
Gegoh nyak dija ganta..

Ki ingok di mekhanai.
Lesoh angon kukhasa.
Asing iluk gumelai.
Niku santokh tabinta..

Ingok di zaman tumbai.
Bugukhau lalang waya.
Injuk mak ngedok khabai.
Dunia, mak kham khua..

Happang segala guwai.
Khugi mak jadi haba.
Tanda ni kita mindai.
Sepegungan khusia..

Nyippok iwa kham di wai.
Nyak jadi tukang jala.
Niku say jadi sakai.
Kak khadu kham cekhamma..

Kamar, goh salai tupai..
Semapu khawang bena.
Najin ya gulak galai.
Pedom kham lollok juga..

Lapah jejama pakai.
Ijah tian say tuha.
Belajakh kimak kelai.
Pubandung selama na..

Kantu jak nyak tikacai.
Dang sikhi, niku cawa.
Nyak lupa tulung tawai.
Dang sippon dilom dada..

Payu, du'a ku indai.
Jama Tuhan say kuasa.
Kekalau jimmoh sawai.
Kham mingan pujejama..

Kipak umukh mak pandai.
Induh kapan togok na.
Kekalau pakhda munyai.
Khanno hakhapan kita...


Tabikpun..

Bekasi, 05 april 2012

Hendri Semaka.