https://lampungsai.com/bang-hensem-seniman-multitalenta-lampung-yang-konsisten-lestarikan-budaya-lewat-sastra-dan-musik/

Tanggamus lampungsai.com – Hendri Semaka, pria kelahiran 1976 yang berasal dari Pekon Banjar Manis, Kabupaten Tanggamus, merupakan sosok seniman Lampung yang patut mendapat apresiasi lebih. Dikenal dengan nama panggung Bang HENSEM—singkatan dari Hendri Semaka—ia merupakan seniman multitalenta yang telah menghasilkan berbagai karya dalam bidang sastra dan musik, khususnya berbahasa dan bernuansa budaya Lampung. Rabu 9/4/25.

https://lampungsai.com/bang-hensem-seniman-multitalenta-lampung-yang-konsisten-lestarikan-budaya-lewat-sastra-dan-musik/

BUSENUNG

SENUNG adalah: Sebuah adat yang ada pada suku Lampung. Senung adalah aktifitas oleh orang semacam Tabib atau ahli nujum untuk minta petunjuk kepada Tuhan Allah SWT, untuk mengambil suatu tindakan yang tepat dalam dunia pengobatan. Misal: Mencari tahu Apa sakit yang kita derita, Apa penyebab kita Sakit, Dokter mana yang cocok untuk kita berobat, Obat apa yang sebaiknya kita konsumsi.

BUSENUNG Adalah melakukan usaha seperti yang dimaksud di atas. AHLI SENUNG menggunakan media tertentu contoh nya seperti bambu atau rotan yang panjangnya sejengkal. Melalui bacaan Do'a tertentu, atas izin Allah, panjang dari bambu atau rotan ini akan 'berubah' menyesuaikan hasil jengkalan dari si ahli tenung. Inilah yang menjadi acuan ketika Ahli Senung mengambil keputusan tepat.

KMP. RAJA BASA

KMP. RAJA BASA

Khadu saka kupenah

Jak jam siwa debingi

Kapal bulayakh nengah

Labuhan Bakau Heni

Putungga niku Adik

Nagu mak makai nyuwi

Kenalan, laju khedik

Dakha senang ku lawi

Nuju mid Pulau Jawa

Ninggal ko pekon Lampung

Mejong bakhong Kham khuwa

Lalang waya mak ukhung

KMP. Khaja Basa

Kayak ya jadi saksi

Mawat nihan kusangka

Tungga ditengah bingi

Senang nihan ku khasa

Ya helau betik hati

Gekhing khatong nyemuka

Mak nangguh khuwa kali

Sekejung ni lapahan

Senang nihan di hati

Adek jadi pilihan

Jak ganta togok nanti

Bela masa bulayakh

Khuwa jam khadu likut

Di Merak kapal nyandakh

Bu ikhing lapah cukut

Beni niku ku tontong

Semakkung ni kham pisah 

Malam ahad nyak khatong

Tulung pay adek penah

KMP. Khaja Basa

Jengan kita bukhasan

Kilu di Say Kuwasa

Togok di bulambanan

Tabikpuun,..

Bakau Heni, 10 Juli 2016

Hendri Semaka

Segata: INGOK LAGI SANAK

Khisok ngimut tenggalan

Lalang Nyak dilom hati

Ingok sunyin indayan

Masa sanak saka ji

Ki khadu memidokhan

Haga mak genok khani

Mulang kena khibo'an

Pagun mak Jekha hati

Subuh khadu telikut

Hanipi sunday di way

Nengis manuk ngekhakkut

Minjak, bang miyoh diapay

Di pinggikh Way cepupput

Ngeliyak way, mekhabay

Sekula lapah cukut

Bebakhongan khik Inday

Mulang anjak sekula

Mengan ni ilung kudan

Ngajak inday cekhamma

Gulay na setokokhan

Mak benni nyilau pinja

Mid kebun bu ikhingan

Mulang, bayoh kok mata

Kena pattit Tabuwan

Wat istilah khiyanan

Sigokh ni bulung lassak

Nyani lamban-lambanan

Sassay makai bekhalak

Kakkak kikim ti khakkai

Jadi khattai khik gelang

Bulung putti tipakai 

Papah dapukh khik gakhang 

Sanak bakas mak kalah

Semapu memainan

Kekak pisang ti ulah

Jadi bedil-bedilan

Lamon musim khik sakhah

Gasing, mubil-mubilan

Mak ngedok khani nikhah

Main ball khik layangan

Petika khani labung

Unyin sanak mehanjak

Mandi mawat ki ukhung

Pekakas mak sebukak

Wat tegakh ilung punjung

Wat moneh tuyun munggak

Kusukhan mak bu takung

Celana gulik tukak

Kak ingok lagi sanak

Tebinta di indayan

Midang di dunia bekhak

Semapu di bagian

Kalau masa telibak

Bukilu jama Tuhan

Mingan seliyak pudak

Kham ngobrol sehaya'an

Tabikpuun,..

Hyogoken, 12 Nopember 2013

Hendri Semaka

Segata: NGELIMAK

Ajo dia ngelimak

Khanno judul ni inday

Nuju mid Abang, mamak

Say khadu bunjak kelay

Buhakhap khik ngelimak

Jama kuti puakhi

Maklum nyak lagi sanak

Buni, kinjuk ya pakhi

Kuti say khadu panjak

Kolpah, kantik khik kunsi

Injuk Nyak bukhung Anak

Ampai bulu kemasi

Say ngukha kilu tawai

Pengatu di pusikam

Nyak appai pandai sunday

Langui Nyak makkung paham

Ya, Nawai ulih angkon

Ku sani ko sekiman

Mak mingan ku ucakkon

Balaq ni kehangguman

Hanjak penekhima'an

Hikhang jak delom hati

Ki kuti muwat ngandan

Nyak khelok mak bu kheti

TABIKPUUN,..

Hyogoken, 26 september 2013

Hendri Semaka

segata: "PENGGETASAN"

Alhamdulillaah togok

Masani penggetasan

Mebeni bias langok

Lom balai kengingiyan

Di kaling bias cakkok

Nyonjong anjak tuttungan

Haga nginjam di khoppok

Pakhina se umukhan

Kapan kak khadu tapok

Di sabah khamik nihan

Babikh pekon kepelok

Ngegettas bu gattiyan

Lebon buya khik sokhok

Ni akuk kehangguman

Say babbai khulang khiccok

Ngattak mi pakai mengan

Kok sanak lunik tandok

Tegakh khik lelaga'an

Wat say main sesegok

Wat ngangon gegaduhan

Lepun moneh sang tottok

Mangkung bela kebian

Luhukh takhu sekhabbok

Tehabu dalih mengan

Sappai moneh pekhetok

Balai mak kengingiyan

Dapukh mingan mehasok

Kasakh sikop inggoman

Happang hulu khik hotok

Tenanag angon angonan

Kak pedom mingan lollok

Bangik ngupi khik mengan

TABIKPUUN,..

Hyogoken, 25 September 2013

Hendri Semaka

"LIMAN''

Liman..

Dang kham setanya lagi

Paling balaq ni Hiwan

Say wat di lambung bumi

Liman..

Di Sumatera jengan ni

Wat moneh say di Thailand

Khek di Afrika, dudi

Liman..

Gajah, basa bakhih ni

Di Lampung Lamon nihan

Lagi zaman sakaji

Liman..

Hiwan langka, Puwakhi

Pengahud anjak Tuhan

Jama Anak Negekhi

Liman..

Sebenokh na, Khejeki

Ulih kham Lampung khawan

Mula kham say ni bagi

Liman..

Kuwat, Nalom khik Bani

Lamon pakai hiburan

Say di Way Kambas, dudi

Liman..

Khadu cutik bilang ni

Ni pasu hulun kaban

Tekhok ngakuk Gading ni

Liman..

Hukhik dipa Nyak, hani

Khimba bukhubah Pekan

Gunung, ni Tanom hubi

Liman..

Miwang, Tiyan lom hati

Bella isi na Pullan

Kayu na, ti Tuwakhi

Liman..

Api salah ku hani

Hukhik ni kasakh Sallan

Belukakh mawat lagi

Liman..

Tanggung jawab sunyin ni

Lapah jejama andan

Kenyin lana Hukhik ni

Liman..

Lapah jaga, Puwakhi

Kantu jadi bitian

Ki Liman, mawat lagi

TABIKPUUN,..

Hyogoken, 10 september 2013 

Hendri Semaka