Minggu, 30 Maret 2014

wayak: "PETANI" (NGINUM WAY JAK PENGAPAT)

"NGINUM WAY JAK PENGAPAT"

*
Sakik ni Nyak Bubukak
Nyusuk di pullan tuha
Mak melamon tengliyak
Jawoh jak indai kanca

Jawoh jak indai kanca
Puwakhi, Emak, Bapak
Mak mulang kimak Buka
Seminggu, moloh cakak

Seminggu moloh cakak
Moloh di Hukhik sakik
Putti matah temajak
Inuman kupi pahik

Inuman kupi pahik
Mak kebeli di Gula
Takhu di Anjung khupik
Nunggal di Pullan tuha

Nunggal di pullan tuha
Khadu induh ke Tahun
Ngandan kebun Kehuwa
Kidang kedau ni Hulun

Kidang kebun ni hulun
Buhakhap, wat tikhah ni
Halok sangun lalakun
Nasip ni Kham Petani

Nasip ni Kham Petani
Mekhalang Pedom lollok
Khega ngubukh di Bumi
Kapan kak Musim togok

Kapan kak Musim togok
Bias, Gula ni mahal
Nyak cawa lain Ngopok
Pemekhittah Kham jahal

Pemekhittah kham jahal
Mak kahud di Petani
Bubukak, bela mudal
Ngijon, ulang laju ni

Ngijon ulang laju ni
Kipak Tilah bu-dusa
Istilah ni Koperasi
Ngakuk sai, Bayakh khuwa.

Ngakuk sai, bayakh khuwa
Tambah kakumbang cutik
Tangih mikikh sekula
Kok hukhik kasakh sakik

**
Dakkung pay cawa hibat
Ki lamon di Industri
Kantu mak temon mawat
Pagun juga, Mengan mi 

Ki Nyak temon sepakat
Istilah Ekonomi
Nyin Negara kham kuwat
Senang ko pay, Petani

Khega kupi bulipat
Pengangguran mak lagi
Tajom candung khik Suwat
Huma, Dakhak, mak mangi

Sangun khadu Hakikat
Anjak tumbay sakaji
Kekhja ni, Unyin Rakyat
Yakdo Dagang khik Tani

Ulih api say mawat
Di Negara kham hinji
Kidang salah di Ubat
Nalom Ngaji, mak nguji

Nginum way jak pengapat
Mati luwak Petani
Hukhik santokh melakhat
Mak mgedok ngebila ni 

TABIK..
Hyogo ken, 01 September 2013 


Minggu, 16 Maret 2014

wayak: "DEKHMAGA KENGINGIYAN"

Cutik pantun ku kakhang, dek..
Kutuju ko mid niku
Ku tulis dalih miwang, 
Nyin jadi angonan mu.

Ibakhat niku jukung, dek..
Kupenah di dekhmaga
Tali kukuh ku pegung
Niku mak labuh dija.

Dija lawok ni Khajuh, dek..
Dekhmaga kengingian
Niku ukhung bulabuh
Tegah motokh haluan. 

Dekhos humbak galumbang, dek..
Kakhas mecoh di batu
Jukung ipa ku tambang
Najin wat, lain Niku.

Haku kindo kekalau, dek..
Niat mak khanja-khanja
Jukung mu liwat helau
Mak tanggom labuh dija.

Dekhmaga kengingian, dek
Labuhan pinggikh khimba
Cadang sapa say ngandan
Khubuh, mawat say haba.



TABIK..
Hyogoken, 02 September 2013 

Sabtu, 15 Maret 2014

wayak: ''UKHUNG''

Kutanom pay do, pekhing
Di langan ilung kudan
Nyak midang, nitip gekhing
Hakhap ku ya ni Andan

Khanggal ni jukuk liyoh
Khanglaya Batu tegi
Bang kikha, ki Nyak jawoh
kahud mu, mawat lagi

Malih do umang-umang
Tinggal kekhuppang lagi
Pilih mu khadu sumang
Nyak tippik mak bu khetti

Tuwon ya, balaq kima
Ti banjakh kiyong lawok
Ku pupuh ya pekhcuma
Mak tanggom kham putawok

Penyana ku kakunang
Lampu di atas bagan
Nyak khelop niku senang
Hinji khadu bagian

Hukhang segok di kakhang
Salai ni khadu bukhak
Ukhung niat nyebekhang
Jambat ni tekhak bakhak

Bulabuh pay do, jukung
Ku tambang di dekhmaga
Mati Nyak sangun mangkung
Lebon unyin kahaga

Bubindikh niku Bukhung
Dunggak batang kahuwa
Sangun bacak do ukhung
Jak gekhing khiwa-khiwa


TABIK.
Hyogo ken, 2 september 2013 

Jumat, 14 Maret 2014

segata: "KEHANGGUMAN"

Kehangguman ku Adik
Lain ki khatong ampai
Cawa lain sebudik
Memata ya kinjuk Way

Memata ya kinjuk Way
Khilau anjak lom hati
Mak puput jemoh sawai
Sampai nyawa mak lagi

Sikop mu Adek sayang
Ibakhat Bulan Bakha
Debingi laju tekhang
Katti Niku nyemuka

Katti niku nyemuka
Bingi mak kelom lagi
Cawa ku lain hapa
Niku Andanan hati

Khadu nemon penyin ku
Pilih ku khadu bella
Du'a dalih pengatu
Gekhing ku, ni tekhima

Gekhing ku ni tekhima
Khanno kilu ku Diku
Niku Uway, Nyak Iwa
Mati Nyak, kimak temu

Lassak lagi kemutik
Mak ubah ni ya Duku
Hanggum ku lain cutik
Khadu tunyin di Niku

Khadu tunyin di niku
Kekalau ya mak ngukhang
Nyin jadi angonan mu
Mula nyak tekhus tekhang

Tabik..
Hyogoken, 5 September 2013 

Kamis, 13 Maret 2014

SEGATA: "JAHAT KETEKHI"

Api ngeba mu kahud
Wangga mu injuk sumang
Kuliak Niku singut
Halok hati mu cadang

Dang santokh ngambakhucut
Kantu sikop mu kukhang
Jak buwok togok cukut
Kahud sikam, mak ngukhang

Niat haga Sembahyang
Lapah benyulu di Way
Ulih say tuha sayang
Mula ngijah khek nawai

Niku mena Nyak dukhi
Sembahyang, mak Imaman
Dang kham Jahat ketekhi
Kok ti tagu, Ngahaman

Menggekhib Nyak di Punduh
Isya di Talang padang
Ki holon lagi Induh
Lalang ki Niku cadang

Khadu sembahyang Fardhu
Moloh luwot Usaha
Sapa say nawai Niku
Kimak sikam say Tuha

Dang kham jahat ketekhi
Cutik-cutik sekhingok
Bekhibok dilom hati
Lom kamar, Ngancing khangok

Sikam Abang, khek Kakak
Mak takhu ngijah nawai
Lain ki sikam hakhak
Pakai mu jemoh sawai

Bacak hija lom hati
Penyin ko pay cawa ku
Ulih, ulang laju ni
Pagun khugi di Niku..

TABIK.
Hyogoken, 10 September 2013