PUISI-PUISI LAMPUNG (dua)

"TEKABOK"

Temon Nyak mak tanggom takhu dija

Di kelasa handop, butabukh kemunyangan.

Lain buwayak, sesimbatan..

Ngeliyak muli bu 'span kepellik'an.

Lain buhinjang Tapis, kumbut sulaman..

Kidang,,
Ajo dia kemajuan.

Mak lagi ngedok penulung kham.

Mana Kham,,
 jejama tekabok..!!

 27 Januari 2013.

"TIKHAM"

Ilung tiyak salju kuliyak wangga kutti

di khatting sakura kimut kutti bugayut

di keliyang bah batang, kutti lalang.

dipa ipa pudak kutti panjak

lupa ko pay Nyak anak, genok pepikha bakha

Dang nyimbak di badan dalih pikikhan

Ku penah pepikha bulan

Tikham ku, lain kecadangan.

21 Desember 2012.

"SIAKH KELOM"

Kekala..
Kham santokh khabai di bingi dalu

Haga siakh ni bulan bakha

Kham mekhabai di kelom

Nyomokh siakh ni cahya.

Kinandi..
Gundang ni halinu yakdolah siyakh

Hulu ni kelom, yakdo cahya

Tiyan mak bakal sejawohan.

Khedik.
Ulih tiyan muindayan.

Khedik.
Ulih tiyan sepekhalluan.

Halinu uwat, andah ni cahya..

Siyakh uwat, lantakhan kelom..

27. 12. 2012

"NYOMOKH"

Goh bakha niku di awang-awang

DI khatusan bittang, niku bu indai

Ku cigau niku mak mingan

Tangih haga ku akuk

Kok cungak nyak mesikhi

Kidang..
khadu sukukh ku lawi

Kena siakhmu najin mak benni

Katti ni salok awan debingi.

13 januari 2013

"NGELAGOK"

Disapa Nyak bucekhita

KI kutti linguk unyin.

DI sapa saya busadu

KI kuti khabai kutagu

Sapa say ku ajak miwang,

Ki kutti gulik lalang.

Jama sapa nyak bu koddo,

Kipak sai kutti mawat..

Tanno,,

Kutti khadu sumang

Katti nyak bekhusap luwoh.

Kutti khadu mejawoh

Katti lapah ku khadu legoh.
Dija. Nyak khisok magoh.

13 Januari 2013

"SINJA"

Matakhani senggayakh di gunung

Butikhai khekhunih debi

Langik mak ngedok tepang

Angin manjau bupedatong iyos.

Sinja...

Mekhawan niku khatong geluk.

Hayu kakhu Nyak kelabungan.

Busukukh niku togok

Teggi kakhu nyak kepanasan.

11 Januari 2013

"ANAK MAYANG"

Putungga niku payah putagu

Bida di wangga sumang di cakha

Kulih ulih di dasokh hati

NI timbal jakhi kikhi mu

Ali-ali di anak mayang

mak buhung lagi.

21 januari 2013

"HIYON"

Bingi manjau nyekiwing ko hiyon tengi

Bupedatong hiwang di dasokh hati

Siakh ni bakha dakha mesaka

Sehakhi appai nambi

Matakhani pagi lagi tangih

Sinja ampai malih sekhingok

Hiyon,,

kah bu indai hampulap

Say hehambokhan di lentikha khidip

Hiyon,,

Katti kundang ku mulang

Palas ngusung unyin ni kehangguman 

Ngekhing ko gekhing kahud ku.

Kasakh hiyon,,

Hampulap gugukh.

katti keppi ni gulik cabuk.

17 Januari 2013

"BELLA"

Khadu bella hili ni kahud ku

Dinana iya tunyin mid niku

Semakkung langok, ni siakh tegi

Cakkok, ni kekhing ko gekhing say bakhih.

Kak khadu nyak malih

ngeson ko tiyak-tiyak pengahud.

Kidang lain jak niku lagi.

01 Januari 2013

"MANOM"

Langik mak ngedok gambakh

Halinu bunjak kejung sang kepas

Lelegohan angin manjau

Putit mulang mid salai

Ngakat hokhol jak batang pekhing

Kham juga mulang, semapu di ulih

Penganik khik anak kajjong.

Manom.

Mak beni lagi kham pedom.

Jimmoh pagi kham minjak.

kipagun mingan, kham moloh busepok.

Kipagun mingan, kham tungga manom.

Semakkung, kham temon-temon pedom.

Mak lagi tungga manom.

26 Januari 2013

"KHAGAH"

Kekhas na tekhaggah nanda ko khagah

Cawa pukkas gelakh ni bakas

Tengis kutti, sikam cawa hatang.

Ngawak..

Nyin kutti babbai sennang

Lain sikam mak pekhnah miwang

Ulih hiwang kundang ni lalang

Ku segok ko uway mata sikam asuk-asuk

Lain liyom,

Nandako sikam menalom.

22 Januari 2013

"JAWOH"

Kung juga kuluk, 

kawai tenggosok minggu say liwat.

Gambakh ni sajadah

Tengbeli lebakhan tahun say menna, pagun mepanjak.

Lupa dipa khang nyegok ko ketupung.
ya Allah,

Induh kebilang dusa khik salah

Dakha jawoh Nyak jak Niku.

24 Januari 2013

Tabikpun.

Hyogoken, Japan.

wayak: ALHAMDULILLAAH

Ya Allah induh kidah

Napi bang kheji juga

Kitattang lagi susah

Injuk mak pekhnah waya

Buttu unyin ni lakkah

Hakhungan ilung ipa

Kok hengas dillom galah

Sekhot ni mak kahingga

Lain santokh nenggakhah

Kidang khanno do wat na

Injuk mak nungga wawwah

Kelom segala-gala

Kidang Alhamdulillaah

Badan munyaian juga

Pak khejeki kung gumah

Asal dang putuk du'a

Temon hani petuah

Tamong kajong dinana

Khisok ngeliyak dibbah

makhi sukukh, luwah na

Kak khadu kham dang pungah

Tawwai ni Hulun tuha

Kalau khejeki nambah

Pak cutik asal lana

Ku khasa mak ki salah

Cawa gukkhu agama

Sukukh, Alhamdulillaah

Khisok-khisok ti hija.

Tabikpuun,

Hyogo ken,10 Januari 2013 

"NYAMBAI"

I.

Mulai ni khelom bingi

Kekikha pukul siwa

Mekhanai dalih Muli

Ngesai dilom kelasa

Muli selang semintang

Mekhanai khia juga

Kayun kukhuk ti undang

Anjak pekon khik makhga

Istilah tamu agung

Sumang kok hejongan na

Senggayakh di lelidung

Bu kasukh mejong sila

Luwah kekuk kebayan

Buwak bu macom khupa

Khiya moneh inuman

Tih, susu khik kahua

Kepala mekhanai pekon

Muaq ngebukak cawa

Kak khadu ni lajukon

Anjak mekhanai baya

Mekhanai selang minjak

Wakil muli mekhanai

Say jak doh khik jak unggak

Semangkung mulai nyambai

II.

Tetabuhan bedana

Khik lagu-lagu Lampung

Ti putokh lom kelasa

Acara nyambai agung

Mekhanai nulis sukhat

Mid muli say ni haga

Nanya gelakah alamat

Cawa, khepa kekikha

Khatong olohan sukhat

Mekhanai hanjak hati

KI Abang temon nyansat

Moloh pai, sukhat hani

Api ya haga sakhat

Cawa ko betik-betik

Ajo olohan sukhat

Nyak demon niku adik

DI Adik nyak buhakhap

Bukilu ki Nyak mingan

Putungga minggu hadap

Kham ti khedok ko khasan

Payu ki khena Abang

Minggu Kham setungga'an

Kekalau Nyak mak bimbang

Jak ganta Kham tunangan

III.

Khannolah tayuh nyambai

Kiwat say bulambanan

Guwai Muli Mekhanai

Kenalan sasukhatan

Say Nyambai lijung khatong

Kukhuk tyan bugilikhan

betoh khasa me betong

Nyekhita lelaga'an

Muli mekhanai Baya

Pekhituk di hak Kudan

Nyonjong ngegulai pukha

Pakai pekhwatin mengan

Wat say mejong di gakhang

Uwat moneh say dillom

Menyin, kantu wat kukhang

Dang sampai baya liyom

Mawat tikhasa-khasa

Khadu togok mehayu

Penutup anjak baya

Nandako, Nyambai khadu

Baya luwah ngehattakh

Mi handop dalih gulai

Mejong sila, senggayakh

Mengan pagi ti mulai

Pak bida pengajangan

Pakai ni Tamu Agung

Pujama memenganan

Kipak sai, mak ki ukhung

IV.

Guwai Nyambai kham Lampung

Anjak tumbai menumbai 

Lapah jejama pegung

Ki Kham nayuh, ti guwai

Sina adat say Agung

Tayuh Muli Mekhanai

Jejama kham ti junjung

Dang sampai ya tikacai

Moloh injuk say khadu

Say muli makai hinjang

Sikop ni khadu tantu

Adat Kham mawat cadang

Togok di Anak umpu

Nyambai pagun kebilang

KI helau di Nawaitu

Kekalau mak kabuang.

Aamiin.

Tabikpuun,,

Hyogo ken, 12 Mei 2013 

wayak lampung: KEKHANDA

Kham hukhik di dunia
Halok mawat ki benni
Dija kah sementakha
lain kik selama ni

kidang kham lamon lupa
Ulih silau guda ni
Khasa umukh kham lana
Injuk mak bakal mati

Induh kapan togok na
Jimmoh sawai kak nanti
Nyawa dakuk say Kuasa
Khatong sesol di hati

Say tippik tinggal haba
Hulun tuha puakhi
Kipak sai mak budaya
Kah miwang ngekhoh jakhi

Apiya mak kuwawa
Tinggal nyesoli dikhi
Tiyan say ngeguwai na
Benyulu, ngisang, mandi

Kapan mawat sepikha
Hinno do nutup dikhi
Lahat tikali menna
Sunyin ni khadu kakhi

Khatong moneh kekhanda
Pecuccu'an ilung ni
Singgah pai di Musholla
Haga ti sembahyangi

Pepujian khik du'a
Hinno do say ngikhingi
Kilu di say Kuasa
Dusa kham ni happuni

Pedom mikhing kham sia
Tanoh mawat ilatni
Sekhadu 'Bang tibaca
Papan bukhak sassai ni

Tibobbok tanoh hada
Tenggalan kham delom ni
Mak benni anjak sina
Mulang kaban puakhi

Butanya 'man robbuka'
Malaikat utusan ni
Ni bilang unyin dusa
Lagi hukhik di bumi

Moloh luwot Kekhanda
Mulang mid di asal ni
Kak khadu induh sapa
Say mansa gilikhan ni.


Tabikpun...
Hyogo ken, 21 maret 2013

wayak Lampung KRESEK BIDAN

Hayu khani jam siwa
Sikam inday mid Pekan
Putungga mak sengaja
Dibbah jak mubil sidan

Payah Nyak ngingok-ingok
Injuk haga kutagu
Bakhong beni ku penok
Nyak mundukh, hati khagu

Dihatiku ngelagok
Injuk ni mak pekhcaya
Pudak kesuk, Nyak digok
Hanipi api nyata

Ki Nyak mak salah ingok
Dinana khani kemis
Niku Dek conggok-conggok
Jama bakas bu kumis

Kuti dek, bi ikhingan
Lapah ilung mentekhi
Kresek bidan di kanan
Nawit sanak di kikhi

Kutanya jama indai
Yakdo ya kodo haku
Ampai hinji nyak pandai
Bang kikha sangun Niku

Induh tahun khik bulan
Beni kham mawat tungga
Niku khadu bulamban
Neggupan say kekhua

Injuk pak haga ku di
Kidang api dayaku
Nyak khabai goh saka ji
Hancukh luwot hatiku

Ngelebon ko liyom
Ku ajak inday malih
Mata nyilikhan sondom
Injuk lagak bekhattih

Anjak jawoh ku penok
Niku moneh Dek nyilikh
Mak beni niku ngijok
Dalih ngebib ko bibbikh...

KAKHOOOOOMMM......
tabikpun.
Hyogoken, 10 mei 2013